असोज २, रसुवा । रसुवागढी नाकाबाट चिनियाँ सामग्री आयात हुन थालेपश्चातु सीमा क्षेत्रमा चहलपहल बढ्न थालेको छ । केरुङ क्षेत्रमा कोभिड–१९ संक्रमण बढेको जनाउँदै चिनियाँ पक्षले गएको साउन २१ गतेदेखि आफ्नो सीमानाका बन्द गरेको थियो । आयात पुनः सञ्चालन भएसँगै सुनसान रहेको रसुवागढी क्षेत्रमा सवारीचालक तथा सामान पल्टी गर्ने कामदारको बाक्लो उपस्थितिले चहलपहल बढाएको हो । गएको भदौ ३० बाट आयात पुनः सुरु भएपश्चात् तीन दिनको अन्तरालमा ५६ चिनियाँ मालवाहक कन्टेनरले रसुवागढीस्थित नेपाली भू–भागमा मालसामान ल्याएको सीमा सुरक्षाकर्मीले बताएका छन् । गएको बिहीबार १४, शुक्रबार तथा शनिबार २१र२१ चिनियाँ कन्टेनरले रसुवागढीमा मालसामान ल्याएको बताइएको छ । सामान आयातमा विगतको अभिलेख हेर्दा दैनिक १४ कन्टेनर मात्र पठाइरहेको चिनियाँ भन्सारले पछिल्लो समय २१ कन्टनेरबाट सामान उपलब्ध गराएको जनाइएको छ । यसबाट उपभोक्ताको माग आपूर्तिमा सहज भएको तथा पालो कुरेर बेरोजगार बसिरहेका यहाँका सयौँ सवारीचालकलाई थप रोजगारी मिलेको छ । बडादसैँलाई केन्द्रित गरी नेपाली व्यवसायीले आयात गराएको सामग्रीमध्ये दुई कन्टेनर दाँतेओखर र ४६ कन्टेनर तयारी पोसाक रहेको प्रहरीले जनाएको छ । यस्तै, अरू सात कन्टेनरमा भने नेपालमा सञ्चालित विभिन्न जलविद्युत् आयोजनाका सामग्री रहेको भन्सार अधिकारीले जनाएका छन् । नेपाल भित्रिएका सामान ढुवानीका लागि सयौँ कन्टेनर रसुवागढी तथा टिमुरे क्षेत्र पुगिसकेको र चिनियाँ एक कन्टेनर सामग्रीले नेपाली दुई कन्टेनरलाई वजन पुग्ने सीमा प्रहरीले जनाएको छ । प्रमुख जिल्ला अधिकारी नवराज जैसीले चीनबाट आयात भएका सामग्री पासाङल्हामु मार्ग अवरुद्व भएपछि स्याफ्रु, मैलुङतर्फबाट काठमाडौं पठाइएको बताए । रासस