कात्तिक १६, काठमाडौँ । मंसिर ४ को निर्वाचन नजिकिदै गर्दा राजनीतिक दल र उम्मेद्वारहरु मतदातालाई विभिन्न योजना सुनाउँदै आफूतर्फ आर्कषित गराईरहेको बेला काठमाडौँ क्षेत्र नं. ८ मा भने मतदाता आफैले साथ दिएको भन्दै आफ्नो जीत सुनिश्चित रहेको प्रतिनिधि सभा सदस्यको उम्मेद्वार जीवनराम श्रेष्ठले बताएका छन् । संस्कृति, पर्यटन तथा नागरिक उड्डयन मन्त्री समेत रहेका श्रेष्ठले काठमाडौँ क्षेत्र नं. ८ मा आफ्नो प्रतिस्पर्धी नै नरहेको बताएका छन् । नेकपा एकीकृत समाजवादीको तर्फबाट गठबन्धनको साझा उम्मेद्वार बनेका मन्त्री श्रेष्ठले आज पत्रकारहरुवीच कुराकानी गर्दै आफ्नो निर्वाचन क्षेत्र सांस्कृतिक सम्पदाको सहर भएकोले त्यसको संरक्षण र प्रचारमा विशेष जोड दिएको बताए । विश्व सम्पदामा सूचीकृत स्वायम्भूनाथ र विभिन्न मठ, मन्दिर देवालय र सांस्कृतिक विशेषताहरु भएकोले विश्वभरिका मानिसहरु अवलोकन र भ्रमण गर्न आउने वातावरण निर्माण गरिने बताए । स्थानीय स्तरमा विकास निर्माणको कामसंगै आर्थिक वृद्धिस्तर बढाउन स्वारोजगारका कार्यक्रममा विशेष ध्यान पु¥याउने बताए । पत्रकारहरुको प्रश्नमा उनले सञ्चार क्षेत्रमाई थप व्यवस्थित बनाउँदै श्रमजीवी पत्रकारहरुको हकहितको पक्षमा आफू रहेको बताए । कानुन तथा नीति निर्माण तहमा आफ्नो विशेष काम हुने भएको हुँदा खबरदारी र विकासको मूख्य हिस्सेदार सञ्चार क्षेत्र रहेकोले सञ्चारमैत्री कानुन निर्माणमा आफ्नो भूमिका रहने बताए । काठमाडौँ क्षेत्र नं. ८ मा वाम–लोकतान्त्रिक गठबन्धनको साझा उम्मेद्वार प्रदेश (क) मा नेपाली काँग्रेसबाट राजुराज जोशी र प्रदेश (ख) मा नेपाली काँग्रेसकै उम्मेद्वार अमिन पाण्डे रहेका छन् । प्रदेश सभाका उम्मेद्वार पाण्डेले स्थानीय निर्वाचनमा आफ्नो निर्वाचन क्षेत्रमा बहुमत प्राप्त मत रहेको जिकिर गर्दै गठबन्धनको जीत सुनिश्चित रहेको बताए ।