कात्तिक १७, काठमाडौं । नेपाल धितोपत्र बोर्डले वैदेशिक रोजगारीमा गएका नेपालीहरूलाई अनिवार्य आईपीओ निष्कासन गर्नुपर्ने निर्देशिका लागु गरेको छ । ‘धितोपत्र निष्कासन तथा बाँडफाँड (छैठौँ संशोधन) निर्देशिका, २०७९’ आजबाट लागु भएको छ । निर्देशिका लागु भएसँगै कुनै पनि कम्पनीले सर्वसाधारणलाई आईपीओ निष्कासन गर्नुभन्दा अगाडि नै १५ दिनको आवेदन म्याद राखेर वैदेशिक रोजगारमा रहेका नेपालीहरूलाई १० प्रतिशत आईपीओ छुट्याउनुपर्नेछ । यस्तो आरक्षण प्राप्त गर्न सम्बन्धित निकायबाट श्रम स्वीकृति प्राप्त गरी विदेशमा बसी रोजगारी गरिरहेको हुनपर्नेछ । बिक्री प्रबन्धकले सर्वसाधारणका लागि आईपीओ निष्कासन गर्नु अगावै १५ दिनको अवधि तोकेर आह्वानपत्र प्रकाशित गर्नुपर्नेछ । विदेशमा काम गरिरहेका नेपालीले यस्तो आईपीओमा आवेदन दिँदा बोर्डबाट धितोपत्र खरिद दरखास्त संकलन सम्बन्धी कार्य गर्न अनुमति प्राप्त आस्वा सदस्य बैंक वा वित्तीय संस्थामा रहेको ‘रेमिट्यान्स बचत खाता’मार्फत भुक्तानी गर्नुपर्नेछ । आरक्षरण दिइएको आईपीओमा आवेदन दिन विदेशमा रोजगार गरिरहेका नेपालीले अनिवार्य रूपमा ‘रेमिट्यान्स बचत खाता’ खोली पछिल्लो ६ महिनामा कम्तीमा पचास हजार नेपाली रुपैयाँ सम्बन्धित व्यक्तिले आफू रोजगार रहेको मुलुकबाट जम्मा गरेको हुनुपर्नेछ । बैंकहरूले विद्युतीय माध्यमबाट सीआरएन नम्बर उपलब्ध गराउने व्यवस्था मिलाउनुपर्ने पनि निर्देशिकामा उल्लेख छ ।