हिन्दू स्वयंसेवक संघ नेपालको राष्ट्रिय घोष टोली प्रशिक्षण वर्ग सम्पन्न भएको छ । नवलपरासीको कावासोतीमा आयोजित वर्गको समापन समारोह पथसञ्चलन एवं घोष-वादन प्रदर्शन गरी भएको हो । समापन समारोहको अध्यक्षता संघका जिल्ला संघचालक भोजराज दाहालले गर्नुभएको थियो भने प्रमुख अतिथिका रूपमा संघका राष्ट्रिय प्रचारक वेद प्रकाशजी रहनुभएको थियो । संघको शाखामा हुने शारीरिक एवं बौद्धिक कार्यक्रमहरूका माध्यमबाट अनुशासन, कार्यकुशलता एवं नेतृत्व क्षमता जस्ता गुण विकास गरी श्रेष्ठ व्यक्तित्व निर्माणको कार्य दैनिक रूपमा चलिरहेकैछ । शारीरिक कार्यक्रममा समरसता, सहजता एवं सांघिकता ल्याउन तथा उत्सव आदि कार्यक्रमहरूमा परम पवित्र भगवाध्वजको मान वन्दना, सूचनाका लागि संघोष वादन आदिका निम्ति घोष विभागको उपयोगिता र विशेष महत्त्व हुने गर्दछ । यसैलाई ध्यानमा राखेर देशभरिबाट घोष वादक स्वयंसेवकहरूको सहभागितामा नवलपरासी, बर्दघाटपूर्व कावासोतीमा चार दिवसीय वर्ग आयोजना गरिएको प्रमुख वक्ताका रूपमा आफ्नो उद्बोधनका क्रममा वेदप्रकाशजीले उल्लेख गर्नुभयो । उहाँले भन्नुभयो, ‘वाद्यवादनद्वारा निकालिने ध्वनिको गुञ्जनलाई घोष भनिन्छ । संघमा स्वयंसेवकहरूले पणव, आनक, शङ्ख, झल्लरी, वंशी एवं तूर्य जस्ता वाद्य–साधनद्वारा समवेतरूपमा विभिन्ना रचना बजाउँदै गरिने निनादलाई घोष भनिन्छ ।’ वर्गमा जम्म १६६ जना स्वयंसेवकहरू शिक्षार्थीका रूपमा सहभागी रहेको संघका राष्ट्रिय शारीरिक प्रमुख विकुल दाहालले बताउनुभयो । मंसिर २१ गतेदेखि प्रशिक्षणमा रहेका स्वयंसेवकहरूले समापनअघि पथसञ्चलन (रूट मार्च) गरेका थिए । पूर्ण गणवेशमा सुसज्जित स्वयंसेवकहरू कावासोती नगरका मुख्य मार्गहरूबाट घोषको स्वरलहरीसँगै पाइला–पाइला मिलाउँदै पथसञ्चलनमा निस्किएका थिए । पथसञ्चलनलाई नगरभरि नै विभिन्न स्थानमा स्थानीयवासीद्वारा पुष्पवर्षा गरी स्वागत गरिएको थियो । सञ्चलन अघि ध्वजारोहण एर्व प्रार्थना भएको थियो। घोष प्रदर्शनको नेतृत्व प्रह्लाद रेग्मी एवं मुकेश कुमारले गर्नुभएको थियो भने मञ्च–सञ्चालन कपिल भट्टले गर्नुभएको थियो । स्वयंसेवकहरूले चार दिनको वर्गअवधिमा आफूले सिकेका विभिन्न रचना बजाएर आगन्तुक, अतिथि एवं दर्शकहरूका अघि प्रदर्शन गरेका थिए ।