संस्कृत भाषामा सपथ ग्रहण गर्ने सांसद : किरणकुमार साह
प्रतिनिधिसभा सांसद किरणकुमार साहले संस्कृत भाषामा शपथ लिनुभएको छ ।
नेपालको परम्परागत ज्ञान–विज्ञानको भाषा र नेपाललाई एकताको सूत्रमा आबद्ध गर्ने भाषा पनि संस्कृत नै भएको उल्लेख गर्दै रौतहट–२ बाट स्वतन्त्रमा निर्वाचित सांसद साहले आफ्नो पद तथा गोपनीयताको शपथ संस्कृत भाषामा लिनुभएको हो ।
नवनिर्वाचित सांसदहरूले नेपालीसहित विभिन्न स्थानीय भाषाहरूमा शपथ ग्रहण गरिरहँदा साह संस्कृतमा शपथ ग्रहण गर्ने एकमात्र सांसद हुनुभएको छ । नेपालको संसदीय परम्परामा यो नयाँ तथा ऐतिहासिक थालनी हो ।
‘संस्कृत विश्वको सबैभन्दा प्राचीन मात्र नभई सबैभन्दा उत्कृष्ट भाषा पनि हो । संस्कृत नेपालसहित विश्वभरि बोलिने अधिकांश भाषाहरूकी जननी पनि हो । हाम्रा संस्कार र संस्कृतिका आधार हाम्रा सबै शास्त्रको भाषा पनि संस्कृत नै हो । अतः यसका लागि नेपालले गौरव गर्नुपर्छ’ बिहीबार प्रतिनिधिसभा भवन नयाँ बानेश्वरमा शपथ ग्रहण समारोहपछि सांसद साहले भन्नुभयो ।
जुन कुराका लागि विश्वमा नेपालको पहिचान स्थापित हुन्छ ती सबै कुरालाई लिएर अघि बढ्नका लागि पनि हामी नेपालीले आफ्ना मूलतर्फ ध्यान दिनैपर्ने उल्लेख गर्दै साहले भन्नुभयो, ‘संस्कार र संस्कृति लोप भएमा राष्ट्रको पहिचान पनि हराउँछ । हामीले यस देशको पहिचान जोगाउन पनि संस्कृत भाषाको प्रसार गर्नु आवश्यक छ ।’
गाडीहरूमा इम्बोस्ड नम्बर प्लेट राख्दा अंग्रेजीमा राख्नुपर्ने व्यवस्थाको विरोध समेत गर्दै सांसद साहले भन्नुभयो, ‘यहाँ त देवनागरी लिपि पनि मास्न खोजिँदै छ । तर त्यसो हुन दिनुहुन्न । हाम्रा भाषा, लिपिसँगै संस्कार र संस्कृतिको जगेर्ना गर्नसके मात्र नेपालको स्वभाविमान र पहिचानको रक्षा हुनेछ ।’