पुस २९, काठमाडौं । प्रधानमन्त्री पुष्पकमल दाहाल ‘प्रचण्ड’ले हस्तकला उद्योगलाई सातवटै प्रदेशमा विस्तार गर्ने बताएका छन् । शुक्रबार ललितपुरमा आयोजित नेपाल हस्तकला महासंघको ४२ औं वार्षिक साधारणसभालाई सम्बोधन गर्दै उनले वाग्मती प्रदेशले हस्तकला उद्योगलाई प्रवद्र्धन गर्ने कामको थालनी गरिसकेको भन्दै सरकारले आगामी दिनमा सातवटै प्रदेशमा हस्तकला क्षेत्रको प्रवद्र्धन गर्ने बताए । उनले हस्तकला क्षेत्र नेपालका लागि विकासको अग्र्यानिक क्षेत्र भएको उल्लेख गर्दै नेपालकै कच्चापर्दाथको प्रयोगबाट नेपालीहरूकै सीप र जाँगरलाई प्रयोग गरी विश्वभर व्यापार गर्न सकिने यो क्षेत्रको प्रवद्र्धन सरकार लाग्ने बताए । उनले हस्तकला क्षेत्र राम्रोसँग प्रवद्र्धन गर्नसके देशको व्यापार असन्तुलनको स्थिति सन्तुलनतिर ल्याउनसक्ने बताए । विदेशी मुद्राको सञ्चिति बढाउन पनि सहयोग पुग्ने विश्वास व्यक्त गरे । प्रधानमन्त्री प्रचण्डले आफूले यसपटक राम्रा बाहेकका काम गर्दै नगर्ने प्रण लिएको बताए । उनले आफूले आफ्नो प्रधानमन्त्रीको तेस्रो कार्यकाललाई ठूलो अग्निपरीक्षाको रूपमा लिएको भन्दै जनताको यो अग्निपरीक्षामा राजनीतिक दलहरू पास भएर देखाउनुपर्ने बताए । उनले विद्यालयको पाठ्यक्रममा नै हस्तकला राखेर पुस्तान्तरण गर्न सरकार लाग्ने पनि बताए । उनले हस्तालालाई शिक्षा क्षेत्रमा प्रवेश गराइ पुस्ता हस्तान्तरणलाई सहज बनाउने र ११ लाख प्रत्यक्ष र परोक्ष सदस्यलाई बढाउँदै लैजाने र यसका लागि बजेटको व्यवस्थापन गर्ने बताए । प्रधानमन्त्री दाहालले निजी क्षेत्रलाई राम्रो विश्वासमा नलिई सरकारले अर्थतन्त्रमा देखापरेका समस्याको समाधान गर्न सम्भव नरहेको पनि बताए । उनले राजनीतिक परिवर्तन भइसकेको र अब आर्थिक क्रान्ति, आर्थिक समृद्धिमा रुपान्तरण गर्नुपर्नेमा आफू प्रयत्नशील रहने बताए ।