अयोध्यामा निर्माणाधीन राम मन्दिरमा भगवान रामको मूर्ति निर्माणका लागि कालीगण्डकीको शीला पठाउने कार्यको तयारी अन्तिम चरणमा पुगेको छ। अयोध्यामा भगवान् श्रीरामको मूर्ति निर्माणका लागि कालीगण्डकीबाट दुई थान शीला अयोध्या पठाउन लागिएको हो। शीला पठाउनुअघि आज विधिपूर्वक क्षमापूजा गरिएको छ । बेनी–गलेश्वर सडकखण्ड अन्तरगत बेनी नगरपालिका वडा नम्बर ६ ठुलो पहिरोस्थित कालिगण्डकी किनारमा रहेको १८ टनको क्वार्जराइट र १६ टनको क्याल साइट नामाकरण गरिएको शिलाको गण्डकी प्रदेश प्रमुख पृथ्वीमान गुरुङ, पूर्वउपप्रधानमन्त्री तथा प्रतिनिधि सभा सदस्य विमलेन्द्र निधि, गण्डकी प्रदेशका निवर्तमान मुख्यमन्त्री कृष्णचन्द्र नेपाली पोखरेल, प्रतिनिधिसभा सदस्य खमबहादुर गर्बुजा, बेनी नगरपालिकाका प्रमुख सुरत केसी, उपप्रमुख ज्योति लामिछाने, प्रमुख जिल्ला अधिकारी तुलसीराम पौडेल, अयोध्याबाट आउनुभएका राम मन्दिर निर्माण समितिका सचिव तथा पुजारी राजेन्द्रसिंह पङ्कज र जानकी मन्दिरका महन्त लगायतले पूजा गर्नुभएको हो । एक हजार बर्षसम्म टिकाउ हुने शिलाको पहिचान भएपछि दुईवटा शिला गण्डकी प्रदेश सरकार र बेनी नगरपालिकाले उत्खनन गर्ने तयारी रहेको छ । उत्खनन गरी एक साताभित्र बेनी नगरपालिका र गण्डकी प्रदेश सरकारले जनकपुर लगेर मधेश प्रदेशलाई हस्तान्तरण गर्ने र त्यहाँबाट केही दिनमा अयोध्या पुर्‍याइनेछ । हिन्दू धार्मिक मान्यताअनुसार शालिग्राम पाइने भएकाले कालीगण्डकी आफैंमा पवित्र नदी मानिन्छ । त्यसमा पनि कालीगण्डकी किनारको बेनी–गलेश्वर क्षेत्रमा पुलह, कपिल जस्ता ऋषिहरू र राजर्षि भरतले तपस्या गरी सिद्धी प्राप्त गरेको पौराणिक मान्यता छ ।