फागुन २, म्याग्दी । मन्दिरमा चढेको भेटीबाट म्याग्दीको बेनी नगरपालिका–९ स्थित गलेश्वर बजार झिलीमिली भएको छ । मन्दिरमा चढेको भेटी खर्चगरी बजारमा सडक बत्ती जडान गरेपछि गलेश्वर बजार सडक बत्तीले झिलीमिली भएको हो । रातको समयमा बजारलाई उज्यालो राख्ने उद्देश्यले प्रसिद्ध धार्मिकस्थल गलेश्वरधाममा भक्तजनले चढाएको भेटीबाट गलेश्वरको प्रवेशद्वारदेखि राहुघाट नदीमा रहेको मोटरेबल पुलसम्मको बजारमा सडक बत्ती जडान गरिएको हो । गलेश्वर शिवालय क्षेत्र विकास कोषको गत पुष २७ गते भएको साधारणसभाको निर्णयबाट गलेश्वर प्रवेशद्वारदेखि राहुघाट नदीको पुलसम्मको बजार क्षेत्रमा र मन्दिर परिसरमा जडान गरिएको बत्तीको उद्घाटन गलेश्वर शिवालय क्षेत्र विकास कोषका अध्यक्ष माघवप्रसाद रेग्मीले गर्नुभएको हो । भक्तजनले चढाएको भेटी मध्ये २ लाख ३० हजार ७ सय ५० रुपैयाँ खर्चमा ५५ वटा सडक बत्ती जडान गरिएको अध्यक्ष रेग्मीले बताउनुभयो । सडक बत्तीले बजारबासीलाई रातको समयमा सहज हुने कोषका उपाध्यक्ष बमबहादुर पुनले बताउनुभयो । बत्ती जडानले चोरीका घटनाहरु कम गराउने र पैदलयात्रीलाई पनि सहज र मन्दिर परिसरमा सीसी क्यामरा जडान गर्नका लागि सडक बत्तिले मदत पुग्ने उहाँले बताउनुभयो । सडक बत्ती मर्मत लगायतको खर्च गलेश्वर शिवलाय क्षेत्र विकास कोषले ब्यहोर्ने समेत उहाँले बताउनुभएको हो । ९ रोपनी क्षेत्रफल फैलिएको विशाल शिलामाथि अवस्थित अलौकी धार्मिकस्थल गलेश्वरधाममा यज्ञशाला हवन कुण्ड ५ लाख ६२ हजार रुपैयाँ खर्चमा पुनस् निर्माण गरिएको छ । जीर्ण अवस्थामा रहेको यज्ञ हवन कुण्ड निर्माणका लागि पोखरा निवासी विष्णु पुनले ४ लाख ५० हजार रुपैयाँ आर्थिक सहयोग गर्नुभएको हो । मन्दिरको पूर्वाधार निर्माणका लागि बेनी नगरपालिका ९ हाल काठमाडौं निवासी कोषका सल्लाकार रमेश सुवेदीले १ लाख ५० रुपैयाँ आथिक सहयोग उपलब्ध गराउनुभएको हो । त्यस्तै मन्दिर परिसरमा विभिन्न दाताहरुको सहयोगमा दुई वटा चौतारी मर्मत गरिएको छ। मन्दिरको मुल गेट अगाडि स्वर्गीय बुबा मिनबहादुर विश्वकर्माले निर्माण गरेको चौतारी बेनी निवासी छोरा जीवन विश्वकर्माले मर्मत सम्भार गर्नुभएको हो । मन्दिरको मूल गेटदेखि कालीगडकी नदीको किनारसम्म भक्तजनलाई आवातजावात गर्न सहज हुने पदमार्ग निर्माण लगायतको पूर्वाधार बनाउनका लागि संघ र प्रदेश सरकारसँग पहल गर्ने अध्यक्ष रेग्मीले बताउनुभयो ।