फागुन ९, काठमाडौं । नेकपा (एकीकृत समाजवादी) का अध्यक्ष माधवकुमार नेपालले राष्ट्रपतिका विषयमा सबै पक्षसँग कुराकानी भइरहेको बताएका छन् । पार्टीको लुम्बिनी प्रदेशको पाँचौँ बैठकका लागि दाङ पुगेका नेता नेपालले राष्ट्रपतिका विषयमा मिडियामा आएका कुरामा बोल्न हतार नगर्ने समेत बताए । “प्रेसमा आएका कुरा सबै सत्य नै हुन्छन् भन्ने कुरा भएन । विभिन्न पक्षले के–के गर्छन्, सुनौँ । अहिले नै बोल्ने कुरामा हतार गर्नु हुँदैन । हतार नगरी पर्दाभित्र नै दिनुपर्छ,” उनले मंगलबार भने, “पर्दाभित्र नै रहोस् । मूल्य–मान्यता, आदर्शलाई त्यागेर कुनै सहमति, सम्झौता सम्भव छैन । विभिन्न पक्षसँग कुराकानी गर्छौँ । विचार मिल्न सक्नेहरूसँग कुराकानी गर्छौँ ।” उनले राष्ट्रपतिमा चाहना राख्नु फरक कुरा भएको तर त्यसबारे सोचिनसकेको बताए । ‘पावर सेयरिङ’मा आफूहरूले भूमिका पाउनुपर्ने भन्दै उनले अरूका लागि ‘बलिदान’ गर्न नसक्ने समेत बताए । “चाहना राख्ने कुरा बेग्लै हो । मैले नै के गर्ने भनेर सोचिसकेको छैन । हाम्रो पार्टीले के गर्ने भनेर सोचेको छैन । हाम्रो पार्टीको धारणा के छ भने, पावर सेयरिङमा हाम्रो पार्टीको भूमिका हुनुपर्दछ । पावर सेयरिङमा भूमिका नभएर सधैँभरि अरूको निम्ति बलिदान हुने र अरूलाई फाइदा हुन हुन सक्दैन,” उनले भने । संघीयतालाई संरक्षण र सुदृढ गर्दै अघि बढ्नुपर्नेमा उनले जोड दिए ।