बागमती सरकारले आज पूर्णता पाउँदै
जेठ ७, काठमाडौं । बागमतीका मुख्यमन्त्री शालिकराम जम्मकट्टेलले आज प्रदेश सरकारलाई पूर्णता दिने भएका छन् ।
११ सदस्यीय मन्त्रिपरिषद् रहेको बागमतीमा आज ५ मन्त्री नियुक्त गर्दै उनले सरकारलाई पूर्णता दिन लागेका हुन् । तत्कालीन माओवादी केन्द्र, नेकपा एमाले र राप्रपाबीचको गठबन्धन सरकार फेरबदल भएसँगै नेकपा माओवादीले कांग्रेस र नेकपा (एकीकृत समाजवादी) सँग मिलेर १० चैतमा प्रदेश सरकार पुनः गठन गरेको थियो ।
सरकारका प्रवक्तासमेत रहेका आन्तरिक मामिला तथा कानुनमन्त्री गंगा नारायण श्रेष्ठले आज दिउँसो शपथ ग्रहण हुन सक्ने बताए । यसअघि नै बुधवार नयाँ मन्त्रीहरूको शपथ कार्यक्रम तय भएपनि अन्तिम समयमा आएर रोकिएको थियो । सरकारको नेतृत्व गरिरहेको माओवादीले मुख्यमन्त्रीसहित आन्तरिक मामिला तथा कानुन मन्त्रालय, भौतिक पूर्वाधार विकास मन्त्रालय र सामाजिक विकास गरी ४ वटा मन्त्रालय सम्हाल्दै आएको छ । त्यस्तै नेपाली कांग्रेसले आर्थिक मामिला तथा योजना मन्त्रालय र खानेपानी, ऊर्जा तथा सिँचाइ मन्त्रालय गरी २ वटा मन्त्रालय मात्रै सम्हाल्दै आएको छ ।
कांग्रेसबाट पहिलो चरणमा आर्थिक मामिलामन्त्री दलका नेता बहादुरसिंह लामा र खानेपानीमन्त्री काभ्रेका सांसद तिर्थ लामा नियुक्त भएका थिए । त्यस्तै आज पर्यटन, उद्योग तथा सहकारी मन्त्रालय, वन तथा वातावरण मन्त्रालय र स्वास्थ्य मन्त्रालयमा कांग्रेसबाट नयाँ मन्त्री नियुक्त हुनेछन् । त्यस्तै सहमतिअनुसार एकीकृत समाजवादीले २ वटा मन्त्रालय पाउने पक्का भएको छ । भागबन्डाअनुसार एकीकृत समाजवादीलाई श्रम, रोजगार तथा यातायात मन्त्रालय र कृषि तथा पशुपन्छी विकास मन्त्रालय टुंगो लागेको छ ।