१३ भाद्र, काठमाडौं । विश्व हिन्दु महासंघले संस्कृतविद् डा. जगमान गुरुङलाई ‘नेपाल ऋषि’ को उपाधि प्रदान गरेको छ । साथै महासंघको वरिष्ठ सल्लाहकारमा मनोनीत गरेको छ । सामाजिक सद्भाव र धार्मिक सहिष्णुताका लागि विश्व हिन्दु महासंघको चुनौती विषयक प्रवचन गोष्ठीमा डा गुरुङलाई उपाधिसहित सम्मान गरिएको हो । समाजसेवी शोभित उप्रेतीको सक्रियतामा दोलखाको चरणावती त्रिवेणीधाम विकास प्रवर्द्धन संघले गुरुङलाई सो उपाधि प्रदान गरेकोमा महासंघले यसलाई अनुमोदन गरेको हो । सम्मान ग्रहण गर्दै संस्कृत विद् डा. गुरुङले आगामी जीवन सामाजिक कल्याणमा लाग्ने बताउनुका साथै उहाँले नेपालको सद्भाव कायम राख्न र्‍याली भन्दा पनि धर्म र संस्कृतिको व्याख्या गर्ने बेला आएको  विचार राख्नुभयो । नेपाल आध्यात्मिक केन्द्रको रुपमा विश्वमा परिचित भएको भन्दै त्यसको अध्ययनमा लाग्न सुझाव पनि दिनुभयो । कार्यक्रममा राप्रपाका पूर्वअध्यक्ष एवम् सांसद पशुपति शमसेर जबराले माता सिता र बुद्धको देश भएको नेपालको सद्भावलाई कसैले खलल पुर्‍याउन नसक्ने बताउनु भयो  । ठूला पार्टीले भ्रष्टाचार र घुसखोरीले देश दूषित बनाएकोमा चिन्ता पनि व्यक्त गर्नुभयो । कार्यक्रममा विश्व हिन्दू महासंघका उपाध्यक्ष एवम् पूर्वमन्त्री दीनबन्धु अर्यालले नेपालमा धार्मिक सहिष्णुतामा खलल पुर्‍याउने प्रयत्न भएको र त्यसलाई रोक्न सबै लाग्नु गर्ने धारणा  राख्नुभयो । डा. जगमान गुरुङ नेपालको मौलिक धर्म संस्कृतिको पक्षमा निरन्तर लागिरहनु भएका संस्कृत विद् हुनुहुन्छ । उहाँ विभिन्न संघसंस्थामा आवद्ध भई धर्म संस्कृतिको संरक्षण कार्यमा लागिरहनु भएको छ ।