भदौ १८, काठमाडौं । जिल्ला प्रशासन कार्यालय काठमाडौंले बालेनको विवादित स्टाटस प्रकरणमा ध्यानाकर्षण भएको बताएको छ । शनिबार राति काठमाडौं महानगरका मेयर बालेन शाहको गाडी ट्राफिकले चेकजाँच गरेपछि उत्पन्न परिस्थितिबारे काठमाडौं प्रशासनले सोमबार विज्ञप्ति जारी गर्दै कर्मचारीलाई कर्तव्य पालनामा बाधा अवरोध नपु¥याउन साथै सामाजिक सञ्जालमा जथाभावी वक्तव्यबाजी नगर्न आग्रह गरेको हो । ‘असल मनसायबाट सम्पादन भएका सरकारी काम र त्यस्तो काममा खटिएका राष्ट्रसेवकहरूलाई निरुत्साहित गर्ने गरी सामाजिक सञ्जालहरुमा व्यक्त भएका अभिव्यक्तिहरुप्रति यस कार्यालयको गम्भीर ध्यानाकर्षण भएको छ,’ प्रशासनद्धारा जारी विज्ञप्तिमा भनिएको छ । आइतबार बालेनको सचिवालयले विज्ञप्ति निकालेर पटक–पटक आम सर्वसाधारण जनताले प्रहरी प्रशासनबाट यस्ता व्यवहार र सास्ती खेप्नु परेको र सम्बन्धित निकायबाट यस्तो प्रवृत्तिको अन्त्य गर्न कोही कहिले अग्रसर नदेखिएको आरोप लगाइएको थियो । सोही विषयमा मुख खोल्दै प्रशासनले ध्यानाकर्षण भएको जनाएको हो । सहायक सीडीओ खड्गबहादुर श्रेष्ठद्वारा जारी विज्ञप्तिमा सरकारी स्रोत साधनको दुरुपयोग हुन नदिन सार्वजनिक बिदाका दिनमा सरकारी सवारी साधनको सञ्चालनमा निगरानी र नियन्त्रण गर्ने कार्य सबै जिल्ला प्रशासन कार्यालयहरु मार्फत् विगतदेखि नै हुँदै आएको स्मरण गराइएको छ ।