पुष ९, काठमाडौं । संस्कृति, पर्यटन तथा नागरिक उड्डयनमन्त्री सुदन किराँतीले गत बुधबार दिएको अभिव्यक्तिको विरोध जनाउँदै सनातन धर्मावलम्बी समूहले काठमाडौंमा प्रदर्शन गरेको छ । समूहले मन्त्री किराँतीको अभिव्यक्ति गैरजिम्मेवारी, गैरसंवैधानिक भएको भन्दै काठमाडौंको बानेश्वरमा प्रदर्शन गरेको हो । प्रदर्शनको र्‍याली गौशालाबाट मध्यबानेश्वरसम्म निकालिएको थियो। बुधवार क्रिसमस फेस्टिभलमा मन्त्री किराँतीले क्रिश्चियनलाई मान्दिन भन्नु संविधान मान्दिन भन्नु हो र संविधान मान्दिन भन्नेहरू देशद्रोही हुन् भन्ने अभिव्यक्ति दिएका थिए । मन्त्री किरातीको अभिव्यक्तिलाई लिएर अरु राजनीतिक दलका नेता कार्यकर्ताले प्रतिक्रिया जनाएका छन् । रास्वपा सभापति रवि लामिछानेले मन्त्री किरातीले साम्प्रदायिक विद्वेष फैलाएको टिप्पणी गर्दै राजीनामा मागेका छन् । उनले लेखेका छन्, ‘संस्कृति मन्त्री सुदन किरातीको पछिल्लो अभिव्यक्ति, सामाजिक सद्भाव र सहिष्णुता खलबलाउने प्रकृतिको, उत्तेजक, गैरजिम्मेवार, पदीय गरिमा विपरीतको र अत्यन्तै खेदजनक छ ।’ राप्रपा महामन्त्री धवलशमशेर राणाले पनि मन्त्री किरातीले क्रिश्चियनको विरोध गरे हत्कडी लगाउनुपर्छ भनेर दिएको अभिव्यक्ति गलत भएको बताएका छन् । बिहीबार राजीनामाको मागसहित पशुपति क्षेत्रमा विरोध प्रदर्शनमा सहभागीहरुले गैरजिम्मेवार मन्त्री बर्खास्त गर्, सुदन किराती राजीनामा दे, धार्मिक क्षेत्रमा गैरधार्मिक नियुक्ति बन्द गर् लगायत प्लेकार्ड बोकेर नाराजुलुस गरेका थिए । मन्त्री किराँतीले दिएको अभिव्यक्तिलाई लिएर अहिले मन्त्री किराँतीविरुद्ध देशभर विरोध भइरहेको छ ।