पुष १३, काठमाडौं । रोजगार अनुमति प्रणाली (ईपीएस) परीक्षाको विषयलाई लिएर प्रदर्शनमा उत्रिएका युवाहरूले ललितपुरको बालकुमारीमा एक जना मन्त्रीको बा २ झ ५८६१ नम्बरको गाडीमा आगो लगाइदिएका छन् । उक्त गाडी भौतिक पूर्वाधार तथा यातायात मन्त्री प्रकाश ज्वालाले प्रयोग गरेका थिए । मन्त्री र पीएसओलाई गाडीबाट बाहिर निकालेर प्रदर्शनकारीले गाडीमा आगो झोसेका थिए । पहिला गाडीको हावा फुस्काएको र पछि तोडफोड गर्दै आगजनी गरेको ललितपुर प्रहरीले जनाएको छ । मन्त्री ज्वालाका सञ्चार सहयोगी जीवन बिसीले ग्वार्कोबाट आउँदै गरेका मन्त्रीको गाडीमाथि १२ बजेतिर बालकुमारीमा आगजनी भएको बताए । प्रदर्शनकारीले सडक पनि अबरुद्ध पारेका छन् । अहिले बालकुमारी क्षेत्र तनावग्रस्त छ । ईपीएसको कोरियन भाषामा सिप बिल्डिङमा आवेदन दिएका युवाले उत्पादनमूलक क्षेत्रमा फाराम भर्न नपाउने भएपछि आन्दोलित छन् । ईपीएस शाखा कार्यालयले सूचना जारी गर्दै सिप बिल्डिङमा आवेदन दिई परीक्षामा सामेल भएर अनुत्तीर्ण परीक्षार्थीले उत्पादनमूलक क्षेत्रमा फाराम भर्न नपाउने बताएपछि केही युवाले पाटन उच्च अदालतमा मुद्दा हालेका थिए । ईपीएस कार्यालयको निर्णयविरुद्ध रिट दायर भएपछि अदालतले आवेदन दिन आदेश दिएको थियो । तर, रिट दायर गर्ने १८ जनाले मात्र आवेदन दिन पाउने गरी आदेश भएपछि अन्य युवा आन्दोलनमा उत्रिएका हुन् । ललितपुरको बालकुमारी क्षेत्रमा अवस्था नियन्त्रण लागि प्रहरीको गोली लागेर दुई जना गम्भीर घाइते भएका छन् । एकजनाको पाटन अस्पतालमा र अर्का एक जनाको किष्ट अस्पतालमा उपचार भइरहेको छ ।