२० पुष, काठमाडौं । सामाजिक सञ्जालमा गोकर्णेश्वर नगरपालिकामा रहेका महिला समूहको नाममा गरिएका कार्यक्रमको सम्न्धबमा विवाद बढेपछि महिला समूहका प्रतिनिधिले नगरपालिकाको ध्यानाकर्षण गराएका छन् । समूहहरूले सीपमूलक तालिम र सांस्कृतिक अधिकारका लागि नगरपालिकासँग सम्झौता गरेर कार्यक्रम गरे पनि सामाजिक सञ्जालमा नकारात्मक रुपमा सम्प्रेषण गरिएको भन्दै महिला समूहका प्रतिनिधिले नगर प्रमुख, उपप्रमुख लगायतको ध्यानाकर्षण गरेका छन् । बिहिवार महिला समूहका प्रतिनिधिले नगर प्रमुख दिपक रिसाल, उपप्रमुख सान्नानी लामा, प्रमुख प्रशासकीय अधिकृत टेकराज पन्थीलाई भेटेर ध्यानाकर्षण गराएका थिए । अहिले सामाजिक सञ्जालमा महिला समुहका कार्यक्रमका नाममा पक्ष विपक्षमा दोहोरि चलिरहेको छ । कामको मुल्यांकन नगरी एकतर्फि सामाजिक सञ्जालमा महिला अधिकार र समुहको विरुद्धमा प्रचारबाजी बढेकोले नगरपालिकाको तर्फबाट सत्यतथ्य प्रष्ट पारिदिन महिला समूहका केही प्रतिनिधिले नगरपालिकाको ध्यानाकर्षण गराएको प्रगति महिला समूहका अध्यक्ष फुलमाया गुरुङ (प्रिती)ले जानकारी दिनुभयो । भेटमा नगरप्रमुख दिपक रिसालले महिला सशक्तिकरणका कार्यक्रम गर्नु पालिकाको दायित्व रहेकोमा जोड दिनु हुँदै महिला समुहका कार्यक्रमहरू प्रभावकारी रहेको बताउनु भयो । उत्पादन, रोजगारी सिर्जना, व्यवसायिकताको अभिवृद्धि, महिला सशक्तिकरणका लागि भएका कार्यक्रमको सन्दर्भमा सामाजिक सञ्जालमा अफवाह फैलाउने प्रयास भएको बताउनु भयो । महिलाको क्षमता विकास गरी उद्यम विकासमा लागेका महिला समुहको मनोबल गिर्ने गरी सामाजिक सञ्जालमा ल्याइएका विवाद प्रति नगर प्रमुख रिसालले दुःख व्यक्त गर्नु भयो । नगरपालिकाले अभिमुखिकरण कार्यक्रम, सीपमुलक तालिम, उद्घोषण जस्ता महिला विकासका कार्यक्रममा सहयोग गरेकोले अहिले मिनि गार्मेण्ट, तेल मिल, अचार जस्ता उद्यम विकासमा महिला समूह सक्षम भएको रिसालले बताउनु भयो ।