राष्ट्रिय सभा सदस्यको उम्मेदवारमा विष्णुदेवि पुडासैनी मनोनित
पुष २३, काठमाडौं । नेपाली कांग्रेसकी पूर्व महासमिति सदस्य तथा नेपाल महिला संघकी काठमाडौं जिल्ला सभापति विष्णुदेवि पुडासैनी राष्ट्रिय सभा सदस्यको उम्मेदवार मनोनयन हुनु भएको छ ।
आइतवार बसेको नेपाली कांग्रेसको केन्द्रीय कार्यसम्पादन समिति वैठकले पुडासैनीलाई वागमति प्रदेशबाट राष्ट्रिय सभा सदस्यको उम्मेदवारमा मनोनयन गरेको हो । सभापति एवं पूर्व प्रधानमन्त्री शेरबहादुर देउवाको सभापतित्वमा पार्टीको केन्द्रीय कार्यालय सानेपा ललितपुरमा बसेको वैठकले पुडासैनीसहित १० जनालाई राष्ट्रिय सभा सदस्यको उम्मेदवारमा मनोनयन गरेको छ ।
मनोनयन हुनेहरुमा बागमती प्रदेशबाट विष्णुदेवी पुडासैनी र जीतजंग बस्नेत, कोशी प्रदेशबाट कृष्णप्रसाद सिटौला, मधेश प्रदेशबाट आनन्दप्रसाद ढुंगाना, गण्डकी प्रदेशबाट किरणबाबु श्रेष्ठ र पदमबहादुर परियार, लुम्बिनी प्रदेशबाट विष्णुकुमारी सापकोटा, कर्णाली प्रदेशबाट कृष्णबहादुर रोकाया, सुदूरपश्चिम प्रदेशबाट बलदेव बोहरा र नारायणदत्त भट्टलाई उम्मेदवारमा मनोनित गरेको छ ।
नेपाली कांग्रेसले सार्वजनिक गरेको निर्णयमा भनिएको छ– “राष्ट्रिय सभा सदस्य निर्वाचन ऐन, २०७५ को दफा १८ को प्रयोजनका लागि संवत् २०८० माघ ११ गते बिहीबार सम्पन्न हुने राष्ट्रिय सभा सदस्य निर्वाचनमा राष्ट्रिय सभा सदस्य पदका लागि नेपाली कांग्रेस केन्द्रीय संसदीय समितिको २०८० पौष २२ गते बसेको बैठकद्वारा नेपाली कांग्रेसको विधान, २०१७ (संशोधन सहित) को धारा ३२(९) बमोजिम तपसीलका उम्मेदवार मनोनयनको निर्णयलाई यो वैठक पारित गर्दछ ।”
राष्ट्रिय सभा सदस्यको निर्वाचन माघ ११ गते बिहीवार हुँदैछ ।