माघ ८, काठमाडौं । भारतको उत्तर प्रदेश राज्यस्थित अयोध्यामा राम मन्दिरको प्राण प्रतिष्ठा सम्पन्न भएको छ । भारतका प्रधानमन्त्री नरेन्द्र मोदीले प्राण प्रतिष्ठा कार्यक्रममा मुख्य भूमिका निर्वाह गरेका थिए । प्रधानमन्त्री मोदीले सोमबार अपराह्न १२ बजेर २९ मिनेटमा राममूर्तिको प्राणप्रतिष्ठा गरेर भारतमा नयाँ युगको थालनी गरेका हुन्। मन्दिरको गर्भ गृहमा मुख्य पूजासहित प्राण प्रतिष्ठा गरिएको हो । प्राण प्रतिष्ठा लगत्तै भारतीय वायुसेनाको हेलिकोप्टरले पुष्पवृष्टि गरेको थियो । प्राण प्रतिष्ठा कार्यक्रममा करिब १३ हजार सुरक्षाकर्मीको घेरामा देशविदेशबाट आएका ७ हजार पाहुनाहरु सहभागी छन्। प्रधानमन्त्री मोदी कार्यक्रम सुरु हुनुभन्दा आधा घन्टाअगाडि राममन्दिर परिसर पुगेका हुन्। प्राणप्रतिष्ठाअघि प्रधानमन्त्री मोदीले मन्दिरको गर्भगृहमा विशेष पूजा गरेका थिए। पूजामा उत्तर प्रदेशका मुख्यमन्त्री योगी आदित्यनाथ, गभर्नर आनन्दीबेन पटेललगायतको उपस्थिति थियो। नेपालका जनकपुरधाम र नेपालगञ्जलगायतका स्थानमा समेत राममन्दिर उद्घाटनका अवसरमा उत्सव मनाउने कार्यक्रम सोमबार बिहानैदेखि चलिरहेको छ। प्राणप्रतिष्ठाको विशेष कार्यक्रम भारतीय समयअनुसार १२ बजेर २९ मिनेट ६ सेकेन्डमा सुरु भएर १२ बजेर ३० मिनेट ३२ सेकेन्डसम्म चलेको थियो।