झण्डै २ अर्ब हुण्डीको ढड्डा व्यवसायी रुपेश श्रेष्ठको घरमा भेटियो
माघ ९ , काठमाडौं । प्रहरीको केन्द्रीय अनुसन्धान ब्यूरो (सीआईबी)ले व्यवसायी रुपेश श्रेष्ठको घरबाट हुण्डी कारोबारको विवरण लेखिएको ढड्डा बरामद गरेको छ ।
ब्यूरोको टोलीले व्यवसायी रुपेश श्रेष्ठको घरमा छापा मार्दा ‘जोन रोबर्ट’ र ‘रेन बेकर’ लेखिएको ढड्डामा ठूलो रकमको कारोबार भएको विवरण फेला पारेको छ । जोन रोबर्ट नाम गरेको ढड्डामा मात्रै १ अर्ब ९८ करोड ५५ लाख रुपैयाँ कारोबार भएको देखिएको छ । उक्त ढड्डामा ९८९ वटा हुण्डी कारोबारको विवरण भेटिएको सीआईबीको भनाइ छ ।
‘रेन बेकर’को नाममा भएको ढड्डामा २७ करोड ५५ लाख ६० हजार रुपैयाँ कारोबारको विवरण भेटिएको छ । यसरी रुपेश श्रेष्ठले कम्तीमा दुई अर्ब २६ करोड रुपैयाँ बढीको अवैध हुण्डी कारोबार गरेको देखिएको सीआईबीका अधिकृतहरुको दाबी छ ।
श्रेष्ठको कोठाबाट बरामद भएको मोबाइल, ल्यापटप, कम्प्युटरको सीपीयू लगायतको प्राविधिक जाँच गर्दा उनले क्रिप्टो करेन्सीको कारोबार गरेको समेत देखिएको छ । अनुसन्धानमा संलग्न अधिकृतहरुका अनुसार, दुईवटा खातामा १ नोभेम्बर २०२२ देखि १७ नोभेम्बर २०२३ सम्मको विवरण भेटिएको छ ।
सीआईबीले ६ मंसिरमा व्यवसायी रुपेश श्रेष्ठलाई हुण्डी र अनलाइन जुवा चलाएको आरोपमा पक्राउ गरेर अनुसन्धान थालेको थियो । विवरणमा विभिन्न व्यक्तिहरुको नाम उल्लेख गरेर रकम डेलिभरी भएको, क्लियर भएको आदि जनाउ दिइएको छ । त्यसमा उल्लिखित हस्ताक्षर आफ्नो कर्मचारी शदर भट्टराईको भएको श्रेष्ठले प्रहरीसमक्ष दिएको बयानमा स्वीकारेका छन् ।