विकलको प्रेरणाले गोकर्णेश्वरले साहित्यिक कार्यक्रमलाई प्राथमिकता दिएको छ : नगर प्रमुख रिसाल
फागुन १५, काठमाडौं । गोकर्णेश्वर नगरपालिकाका नगर प्रमुख दीपक रिसालले वरिष्ठ साहित्यकार रमेश विकलको प्रेरणाले नगरपालिकामा साहित्यिक कार्यक्रमहरु प्राथमिकताका साथ आयोजना गर्न प्रेरणा मिलेको बताउनु भएको छ ।
बुढानीलकण्ठ सांस्कृतिक–साहित्यिक महोत्सवको दोश्रो दिन शनिवार चौतारि सेसनमा आफ्नो धारणा राख्नु हुँदै रिसालले आरुबारीको चापाबोटमा रमेश विकलले साथीहरुसँग बसेर कला साहित्यको कुराकानी गर्नु हुने स्मरण गर्नु भयो । अग्रज साहित्यकारहरुको सम्मानमा साहित्यिक गतिविधिलाई गोकर्णेश्वरले महत्व दिंदै आएको बताउनु भयो ।
रिसालले अगाडि बताउनु भयो– “रमेश विकलले साथीहरुसँग बसेर कला साहित्यको कुराकानी गर्नु हुन्थ्यो, विकल र उहाँका साथिहरुले आरुबारीको चापाबोटमा गर्नु हुने साहित्यिक कुराकानी अझै पनि त्यो परम्परा यथावत रहोस् भन्नका लागि आफ्नो नगरमा नियमितजसो साहित्यिक गतिविधि गरिरहेका छौं ।”
सो सेसनमा बुढानीलकण्ठ नगरपालिकाका नगर प्रमुख मिठाराम अधिकारीले वरपर सिमा जोडिएको नगरपालिकासँग समन्वय गरेर नगरका विकासलाई अगाडि बढाउदा दीर्घकालिन र प्रभावकारी हुने धारणा व्यक्त गर्नु भएको थियो । टोखा नगरपालिकाका नगर प्रमुख प्रकाश अधिकारीले चौतारी नेपाली जनजीवनको महत्वपूर्ण पक्षरहेको बारे धारणा राख्नु भएको थियो । यस सेसनको अध्यक्षता सुर्यनाथ उपाध्यायले गर्नुभएको थियो ।