फागुन १८, काठमाडौं । राष्ट्र गुरु योगी नरहरिनाथ नेपालको इतिहास मौलिक धर्म संस्कृतिका उपासक र नेपाल आमाको सपुत भएको धर्मसंस्कृतिको क्षेत्रका चिन्तकहरुले बताएका छन् । फागुन १७ बिहिवार विश्व हिन्दू परिषद् नेपालले योगी नरहरिनाथको जन्मजयन्तीको अवसरमा आयोजित कार्यक्रमका वक्ताहरुले योगी नरहरिनाथ नेपालको इतिहास मौलिक धर्म संस्कृतिका उपासक तथा नेपाल आमाको सच्चा सपुत भएको बताए । लेखक तथा संस्कृति चिन्तक केशव प्रसाद चौलागाईले योगीबाट आजको पुस्ता र बालबालिकाले प्रेरणा लिनु पर्नेमा जोड दिनु भयो । धर्म संस्कृति र इतिहासको पक्षमा योगीको योगदान अतुलनीय रहेको चौलागाईले बताउनु भयो । उहाँले अगाडि जोड दिनु भयो योगीबाट नेपाली समाजले धेरै कुरा सिक्न जरुरी छ । नेपाल वेद विद्याश्रम, गौशालाका प्राचार्य विष्णु प्रसाद पोखरेलले राष्ट्र गुरु योगी नरहरिनाथले वैदिक शिक्षा, धर्म, संस्कृति र अध्यात्मबाट नेपाली समाजलाई एक शुत्रमा बाँध्नु भएकोले उहाँको शिक्षालाई आचरणमा उतारेर योगदानको कदर गर्न सके मात्र उहाँ प्रति सच्चा सम्मान हुने बताउनु भयो । योगी नरहरिनाथ नेपालको आफ्नै मौलिक शिक्षा पद्धतिका पक्षधर सिद्ध पुरुष हुनु भएकोमा जोड दिनु भयो । विश्व हिन्दू परिषद् नेपाल उपत्यका समितिका उपाध्यक्ष शान्ता नरालले नेपालको मौलिक धर्म संस्कृति विरुद्धको षडयन्त्रलाई बुझेर धर्म संस्कृति संरक्षणका लागि अगाडि बढ्न आवश्यक रहेकोमा जोड दिनु हुँदै यसका लागि योगी जीबाट प्रेरणा लिन सकिने बताउनस भयो । जन्मजयन्ती समारोह नेपाल वेद विद्याश्रम, गौशालामा भएको थियो ।