चैत्र २, काठमाडौं । अमेरिकाको क्यालिफोर्नियामा स्थापना भएको पहिलो मुक्तिनाथ मन्दिर परिसरमा शिवलिङ्ग स्थापना गरी प्राणप्रतिष्ठा गरिएको छ। अमेरिकामा रहेका हिन्दु सनातन धर्म मान्ने व्यक्ति र बौद्धमार्गीहरुको हजारौँको सङ्ख्यामा सहभागिता मुक्तिनाथधाम मन्दिर परिसरमा लाख बत्ती बाल्ने, लघु रुद्री एवं रुद्राभिषेक गरी कार्यक्रम सम्पन्न भयो । कार्यक्रम अपेक्षा गरिएभन्दा निकै उच्च स्तरमा सम्पन्न भएको विश्लेषण गर्दै मुक्तिनाथधाम संस्थापक समितिका अध्यक्ष अनिल पाण्डेले सहभागी तथा सहयोगी सबैलाई हार्दिक धन्यवाद व्यक्त गरे । एक सातादेखि मौन व्रत बसेर प्राणप्रतिष्ठापछि बोलेका अध्यक्ष पाण्डेले भने– "हजारौँ शुभचिन्तकहरूको सहयोग र सहभागिता विना नेपालीको धर्म, संस्कार र पहिचान अभिवृद्धि गर्ने यो पवित्र कार्य सम्भव हुने थिएन ।" यो सबै हिन्दु तथा बौद्ध धर्ममा विश्वास गर्नेहरूको साझा आस्थाको केन्द्र हो भन्ने कुरालाई हजारौँ व्यक्तिको सहभागिताले प्रस्ट अनुमोदन गरिदिएको अध्यक्ष पाण्डेको धारणा छ । त्यसैगरी महाशिवरात्रि पर्व, शिवलिंग प्राण–प्रतिष्ठा एवं रुद्राभिषेक कार्यक्रमलाई सम्पन्न गर्न एघार दिनसम्म उपवास, जलाहार, निराहार लगायतका कठोर व्रत गरी हिन्दु वैदिक परम्परा अनुसार भगवानको प्राण प्रतिष्ठा गर्ने महत्त्वपूर्ण कार्यमा सहभागी भएका कर्ताहरु मुक्तिनाथधामको इतिहासमा सदा स्मरणीय हुनुहुने अध्यक्षको धारणा छ । यस महाउत्सवलाई वैदिक परम्परा अनुसार सम्पन्न गर्न महत्त्वपूर्ण भूमिका खेल्ने आफ्नो टिमका सम्पूर्ण सदस्यहरू, यसलाई सफल पार्न दिन रात परिवार नभनी अहोरात्र काम गर्नुहुने सम्पूर्ण गुरुहरूप्रति पनि अध्यक्ष पाण्डेले आभार प्रकट गरे।‘विदेशी भूमिमा पनि गुरु पदमप्रसाद नेपालको नेतृत्वमा १६ जनाभन्दा बढी पुरोहितहरुको सहभागिता गराई इतिहास रच्न सफल गराई दिनुभएकोमा विनीत भावले धन्यवाद प्रकट गर्दछु’ पाण्डेले भने । धार्मिक आस्थाका साथ जोडिएका मनलाई फुट्न नदिने प्रतिबद्धता अध्यक्ष पाण्डेले व्यक्त गरे