१७ असार, काठमाडौं । फ्रान्सको संसदीय निर्वाचनको पहिलो चरणमा घोर दक्षिणपन्थी पार्टी नेशनल रेलीले अग्रता लिएको छ । यसले फ्रान्सको राजनीतिमा नेशनल रेलीको प्रभावलाई पुष्टि गरेको छ र सत्ताको ढोकाको नजिक पुर्‍याएको छ ।

प्रवासी विरोधी नेशनल रेलीका नेता मरिन ले पेनले निर्वाचन परिणामप्रति उत्साहित हुँदै वर्तमान राष्ट्रपति इम्मानुअल म्याक्रो गुट तहसनहस भएको बताएकी छन् । पहिलो चरणको निर्वाचनमा रेलीले ३३.२ प्रतिशत मत पाएको छ । वामपन्थी गठबन्धनले २८.१ प्रतिशत र म्याक्रोको पक्षमा २१ प्रतिशत मात्र मत प्राप्त भएको बीबीसीले जनाएको छ । यसअघि सार्वजनिक चुनावी सर्वेक्षणका नतिजाले पनि मरिन ले पेन नेतृत्वको नेशनल रेलीले सबैभन्दा धेरै सिट जित्ने देखाइएको थियो ।

फ्रान्स जस्तो  ‘क्रान्तिकारी देश’ को आधुनिक कालखण्डमा दक्षिणपन्थको यो स्तरको विकासलाई धेरै राजनीतिक विश्लेषकहरू अनपेक्षित मान्छन् । नेशनल रेलीले नयाँ प्रधानमन्त्रीको रुपमा २८ वर्षीय जोर्डन बारडेलालाई अघि सारेको छ । बारडेलाले पनि समर्थकहरुलाई सम्बोधन गर्दै फ्रान्सेली जनताको साथ पाए आफू प्रधानमन्त्री बन्ने बताएका छन् । 

फ्रान्समा ५७७ सिटको नेशनल एसेम्बलीमा बहुमत हासिल गर्न २८९ सिट चाहिन्छ । फ्रान्सको निर्वाचनमा घोर दक्षिणपन्थी पार्टी नेशनल रेलीले पहिलो चरणको निर्वाचन हालसम्म जितेको छैन । यद्यपि दोस्रो चरणको निर्वाचनबाट रेली सबैभन्दा ठूलो दल बन्ने निश्चित जस्तो देखिएको बीबीसीले जनाएको छ । 

फ्रान्समा आइतवार पहिलो चरणको मतदान भएको थियो । दोस्रो चरणको मतदान ७ जुलाईमा हुनेछ ।