१६ साउन, काठमाडौं । मङ्गलवार राती परेको अविरल वर्षाका कारण काठमाडौं उपत्यकाका विभिन्न स्थान डुबानमा परेका छन्। अविरल वर्षाका कारण नदीको बहाव बढी उपत्यका डुबानमा परेको हो ।
बाढीका कारण उपत्यकाका नदी किनार छेउका बस्तीहरु सडक, होटल, विद्यालय जलमग्न भएका छन् ।
बल्खुस्थित तरकारी बजार र सुकुम्वासी बस्तीमा पनि बाढी पसेकोले डुबानमा छ । विहान ४ः०० बजेदेखि जिल्ला काठमाण्डौं वडा नं. १७ बल्खु एरियाको वागमती नदीमा बाढी आई घरहरु डुबान भएको खबर प्राप्त हुनासाथ नेपाल प्रहरीको विपद् उद्धार टोली आवश्यक उद्धार सामाग्रीहरुसहित बाढीमा फसेका व्यक्तिहरुलाई सकुशल उद्धार गरी आफन्तको जिम्मा लगाइएको छ ।
उद्धार गर्नेक्रममा काठमाडौँको बल्खु खोलामा एक जनाको शव फेला परेको छ । खोलामा आएको बाढीले बगाएर उनको मृत्यु भएको हुनसक्ने प्रहरीको अनुमान छ । बाँके घर भएका सुकुम्वासी बस्तीमा बस्ने ४५ वर्षीय राम सरूप महतोको बुधबार बिहान बल्खु पुल मुनि अड्किएको अवस्थामा शव भेटिएको प्रहरीले जनाएको छ ।
अविरल वर्षाका कारण काठमाडौँको कीर्तिपुर नगरपालिका– १० स्थित सुन्दरीघाटमा रहेको राधा स्वामी एरियामा फसेका १५ जनाको सशस्त्र प्रहरीले उद्धार गरेको छ ।
बागमती यसका सहायक नदीहरू हनुमन्ते, मनोहरा, धोविखोला, विष्णुमती, नख्खु, बल्खु खोलालगायत सबैमा जलसतह सतर्कता तहदेखि खतराको तह आसपास रहेको जल तथा मौसम विज्ञान विभागले जनाएको छ।
आज काठमाडौँ, ललितपुर, भक्तपुर, रुपन्देही, अर्घाखाँची, स्याङजा, गुल्मी, कपिलवस्तु, दैलेख, प्युठान, रोल्पा, सल्यान, सुर्खेत, कैलाली, कन्चनपुर र आसपासका जिल्ला भई बहने अधिकांश स-साना नदीहरुमा बहाव उल्लेख्य बढ्ने पूर्वानुमान छ ।