२३ साउन, काठमाडौं । हेटौंडामा कम्पनी दर्ता गरी कार्यालय खोलेर अनलाइन ठगी धन्दा चलाएको आरोपमा ९ भारतीय नागरिकलाई प्रहरीले पक्राउ गरेको छ । अनलाइन ठगीधन्दा चलाइरहेको सूचनाको आधारमा सोमवार साँझ प्रहरीले अनलाइन ठगीमा संलग्न ठगहरुलाई कार्यालयबाट पक्राउ गरेको हो ।
पक्राउ पर्नेमा भारतको पटना थाना आलमगंजका २८ वर्षीय नवनित कुमार, झारखण्डका २७ वर्षीय शाहरुख खान, बिहारका २९ वर्षीय कुन्दन कुमार, नैनिताल उत्तराखण्डका २६ वर्षीय आशिष कब्डौला, राँची झारखण्डका ३४ वर्षीय विशाल कक्कड, राँची झारखण्डका ३८ वर्षीय लोकेशकुमार दुवे, राँची झारखण्डकै २९ वर्षीय विकासकुमार सिंह, नांगलोड वेस्टी दिल्लीका २८ वर्षीय अरुण कुमार र गजियावाद उत्तर प्रदेशका ४० वर्षीय कुनाल शर्मा छन् ।
मकवानपुर प्रहरीले सोमवार साँझ हेटौंडा उपमहानगरपालिका–४ पारिजातपथस्थित प्रमोद वाग्लेको घरको फ्ल्याट भाडामा लिएर कार्यालय सञ्चालन गरी अनलाइन ठगी धन्दा चलाइरहेको सूचनाको आधारमा छापा मारेको थियो ।
भारत नयाँदिल्ली घर भएका द्रविनकुमार सिंहको नाममा १० फागुन २०८० मा हेटौंडा उपमहानगरपालिका कार्यालयमा ‘मेडिअसिष्ट’ कम्पनी दर्ता गरी परामर्श सेवा प्रदान गर्ने उद्देश्यले कम्पनी खोलेको प्रहरीले जनाएको छ । उक्त कम्पनी सोही मितिमा आन्तरिक राजस्व कार्यालय हेटौंडामा मानव स्वास्थ्य सम्बन्धी अन्य क्रियाकलापका सेवा प्रदान गर्ने प्रयोजनका लागि दर्ता भएको प्रहरीले बताएको छ । जुन उद्देश्यले कम्पनी दर्ता गरिएको थियो त्यो अनुसारको कुनै पनि कार्यहरु हालसम्म पनि नगरिएको प्रहरीले जनाएको छ ।
अनलाइन ठगेको सबै डाटा भारतको राँचीस्थित हेड अफिसमा मात्रै रहेको भेटिएको मकवानपुरका प्रहरी प्रमुख सिताराम रिजालले बताउनुभयो । उहाँको अनुसार उक्त कम्पनीबाट कुनै पनि आर्थिक कारोबार कानुन बमोजिम नगरिएको साथै अभिलेखीकरण पनि नभएको, भारतको राँचीस्थित हेड अफिसमा मेन सरभर राखेर ‘क्वीक कल क्लाइन्ट सफट्वेयर’ मार्फत काम गर्ने गरिएको, सफ्टवेयरमार्फत ‘टार्गेट’ व्यक्तिको पहिचान गरी उसको सम्पूर्ण विवरण सफ्टवेयरमार्फत नै भारत पठाउने गरिएको प्रारम्भिक अनुसन्धानबाट खुलेको छ । ‘मेडि असिष्ट’ कम्पनी देखाएर सर्वसाधारणलाई अनेकौं प्रलोभनमा पार्ने, सट्टेबाजी खेलाउने, क्रिप्टोकरेन्सीको काम गर्ने, उपहार परेको वा पार्सल आएको नाममा अनलाइन ठगी गर्ने गरेको एसपी रिजालले जानकारी दिनुभयो ।
ठगी धन्दामा संलग्न कम्पनीमा १२ जना भारतीय नागरिक मात्रै कार्यरत रहेकोमा कम्पनीका सञ्चालक द्रबिनकुमार सिंह, रजत शर्मा र प्रकाश भनिने आरोपित तीन जना फरार रहेको प्रहरी प्रमुख रिजालको भनाइ छ ।
उक्त कार्यालयबाट ल्यापटप ७ वटा, राउटर ३ वटा, मोबाइल १३ वटा, हार्डडिस्क १, बेव क्यामेरा १, मेडी एसिस्ट डाइरेक्टर लेखेको स्ट्याम्प २ थान, मेडी एसिस्ट लेखेको स्ट्याम्प २ थान लगायत सामान बरामद भएको छ ।
मकवानपुरका प्रहरी प्रमुख रिजालका अनुसार कम्पनी दर्ता गरी कार्यालय नै राखेर अनलाइन ठगीमा संलग्नलाई पक्राउ गरी अदालतमा पेस गरिएको छ ।