२४ साउन, काठमाडौं । राष्ट्रिय स्वतन्त्र पार्टी बागमती प्रदेशको ‘क्लोज क्याम्प’ आज र भोलि भक्तपुरमा भइरहेको छ । प्रदेशस्तरमा विभिन्न विषयमा गरिएको गहन छलफललाई विस्तार गर्नका लागि सो क्याम्प भक्तपुरमा भइरहेको हो ।
‘क्लोज क्याम्प’मा केन्द्रमा जस्तै विचार, संगठन, अभियान, मूल्य–मान्यता, संसदीय मामिला र क्यान्डिडेट क्लब/लिडरसिप एकेडेमी गरी ६ वटा विषयमा समूहलमा छलफल भइरहेको छ ।
राष्ट्रिय स्वतन्त्र पार्टी (रास्वपा) ले पार्टीको वैचारिक, राजनीतिक र सांगठनिक छलफललाई प्रदेश तहमा पनि विस्तार गरेको छ ।
गत साता केन्द्रीय तहका नेताहरूका लागि आयोजित बन्द कार्यशाला (क्लोज क्याम्प)को समापनमा रास्वपाले प्रदेशस्तरमा पनि गहन छलफलका लागि ‘क्लोज क्याम्प’ गर्ने निर्णय गरेको थियो । निर्णयअनुसार रास्वपाको बागमती प्रदेश समितिले बिहीवार र शुक्रवार भक्तपुरमा ‘क्लोज क्याम्प’ राखेको छ । क्याम्पमा प्रदेश समितिका पदाधिकारी, सदस्य, जिल्ला संयोजक, उपसंयोजक एवं प्रदेशस्तरीय विभागका पदाधिकारी र सदस्यसहित दुई सय ५० हाराहारी नेता कार्यकर्ता सहभागी छन् ।
बागमती प्रदेशस्तरीय ‘क्लोज क्याम्प’को सहजीकरण केन्द्रीय कोषाध्यक्ष लिमा अधिकारी, केन्द्रीय सदस्यहरू शिशिर खनाल, सोविता गौतम, पुकार बम र केन्द्रीय विभागका कृष्णमान श्रेष्ठलगायतले गरेका छन् ।
रास्वपाले प्रत्येक प्रदेशको क्लोज क्याम्पको सहजीकरणका लागि केन्द्रीय नेताहरू खटाएको छ ।
अन्य प्रदेशमा पनि ‘क्लोज क्याम्प’ गर्दै जाने पार्टीले जनाएको छ ।