खानेपानी महसुल वृद्धिविरुद्ध धरान उपमहानगर कार्यालय परिसरमा नाराबाजी
२४ साउन, काठमाडौं । खानेपानी शुल्क तथा महसुल वृद्धिविरुद्ध धरान उपमहानगरपालिका परिसरमा चर्को नाराबाजी भएको छ । आइतवार भएको पत्रकार सम्मेलनमा उपमहानगरपालिकाका मेयर हर्क सम्पाङ्ले बैंकको ऋण तिर्नका लागि महशुल बढाएको भन्दै फिर्ता नहुने बताएपछि कार्यालयमा परिसरमा चर्को नाराबाजी भएको हो ।
इलाका प्रहरी कार्यालय धरानका प्रमुख डीएसपी मानबहादुर राईका अनुसार प्रदर्शनकारीहरु उपमहानगरपालिका कार्यालय प्रवेश गर्ने क्रममा प्रहरीसँग धकेलाधकेल भयो । त्यस क्रममा एक जना प्रहरी कर्मचारीको औंलामा चोट लागेको उहाँले बताउनुभयो ।
करिब २०० जना प्रदर्शनकारीहरुले धरान उपमहानगरपालिका कार्यालयबाहिर नाराबाजी गरिरहेको र सामान्य धकेलाधकेल भएको उहाँको भनाइ छ ।
आइतबार पत्रकार सम्मेलनमा धरान उपमहानगरपालिकाका मेयर हर्क साम्पाङले एसियाली विकास बैंकको ऋण तिर्नका लागि महशुल बढाएको भन्दै फिर्ता नहुने बताउनुभएको थियो । त्यसको भोलिपल्ट सोमवार धरानमा क्रियाशील १० राजनीतिक दलहरुले धरानको वडा नं ११, १५ र १६ मा रहेको खानेपानी महसुल काउन्टरमा तालाबन्दी गर्नुभयो । बिहीवार बिहान उपमहानगर अगाडि महसुल वृद्धिविरुद्ध धर्ना थियो ।
धरानका मेयर अध्यक्ष रहने धरान खानेपानी व्यवस्थापन बोर्डले १ साउनबाट लागू हुनेगरी खानेपानी महसुल र शुल्क वृद्धि गरेको थियो । अहिले पनि सोही राजनीतिक दलले महसुल वृद्धिविरुद्ध विरोध गरिरहेका छन् ।