९ भाद्र, काठमाडौं । रामेछापको दोरम्बा शैलुङ–३ लेखर्क बस्तीमा शनिवार मध्यराति गएको पहिरोमा हालसम्म ६ जनाको शव फेला परेको छ ।
प्रमुख जिल्ला अधिकारी अनिता निरौलाका अनुसार अविरल वर्षापछि गएराति गएको पहिरोले चारवटा घर बगाउँदा बेपत्ता भएकामध्ये ६ जनाको शव फेला परेको र अझै ४ जना बेपत्ता रहेको छन् ।
मृत्यु हुनेमा स्थानीय विद्यालयकी बाल कक्षा शिक्षिका ३० वर्षीया चण्डीका थापामगर र उनका २ वर्षका छोरा आयुस रहेको प्रहरीले जनाएको छ । मृतक अन्य ४ जनाको पहिचान खुल्न सकेको छैन ।
एकजना बालिका अञ्जना श्रेष्ठको घाइते अवस्थामा उद्धार गरिएको छ । उनको कम्मरभन्दा मुनिको भाग चलेको छैन । उपचारका लागि काठमाडौं ल्याइएको छ ।
मृत्यु हुनेमा दोरम्बा शैलुङ–३ की ३२ वर्षीय चण्डिका श्रेष्ठ, उनका १८ महिनाका बालक आमुष रहेका छन् । यस्तै, ५७ वर्षीया उर्मिला पहरी, ३० वर्षीय सन्दीप पहरी, ११ वर्षीय बालक सन्तोष पहरी र १४ वर्षीय विज्ञान पहरी रहेको जिल्ला प्रहरी कार्यालय रामेछापले जनाएको छ ।
पहिरोमा परी ४ जना अझै बेपत्ता छन् । उनीहरूको खोजी कार्य भइरहेको छ । पहिरोले स्थानीयका चार वटा भैँसी, तीनवटा गाई, २९ वटा बाख्रा लगायतका पशु वस्तु तथा धनमाल समेत बगाएको छ ।
बाढी र पहिरोले उक्त क्षेत्र सडक सम्पर्कविहीन हुन पुगेको छ । स्थानीय खोलाहरूमा आएको बाढीले दुईवटा पक्की पुलमा समेत क्षति पुर्याएको छ । बाढीले ढाइगाउँ खोला, छाङ खोला तथा घट्टे खोलाको पक्की पुल बगाएको छ । बाढीले रामेछाप र दोलखाको सीमानामा रहेको मिल्ती खोलाको पुलमा समेत क्षति पुर्याएको छ । पहिरो प्रभावित क्षेत्रमा उद्धारका लागि प्रहरी परिचालन गरिएको छ ।