११ भाद्र, काठमाडौं । राष्ट्रिय स्वतन्त्र पार्टी (रास्वपा)ले संस्थापक महामन्त्री मुकुल ढकाललाई साधारण सदस्य समेत नरहने गरी निष्कासन गरेको छ । रास्वपाको केन्द्रीय समितिको मंगलवार बिहान बसेको बैठकको निर्णयअनुसार ढकाललाई साधारण सदस्य समेत नरहने गरी निष्कासन गरेको हो । 

रास्वपाले साधारण सदस्यबाट किन नहटाउने ? भन्ने विषयमा ढकाललाई २४ घण्टाभित्र स्पष्टीकरण दिने गरी यसअघि सचिवालय र केन्द्रीय समिति बैठकले पत्र पठाएको थियो । ढकालले जवाफ दिँदा सभापति रवि लामिछानेको नैतिक धरातल नरहेको र उहाँ  ‘ठग’ भएको प्रमाणित आफूले गर्नसक्ने पत्र रास्वपालाई पठाउनुभएको थियो । 

ढकालले रास्वपालाई दिएको जवाफ स्पष्टीकरण नभएको र कुण्ठा व्यक्त गरिएको नेताहरुले बताएका छन् ।

बैठकले साधारण सदस्यबाटै निष्कासन गरेपछि उहाँले आफ्नो प्रतिक्रिया सामाजिक सञ्जालमा लेख्नुभएको छ – “रवि लामिछाने क्लबबाट निष्कासित भएको हुँ । राष्ट्रिय स्वतन्त्र पार्टीबाट निष्कासन गर्ने अधिकार क्लबलाई छैन । न्यायिक निकायले क्लबको कारबाहीलाई बदर गरेपछि, नैतिकताको आधारमा रवि लामिछानेले पार्टीको साधारण सदस्यबाट राजीनामा दिनपर्छ । रवि लामिछानेले आफूँविरूद्ध आएका प्रमाणलाई किर्ते भन्दै जनतामा भ्रम छरी राजनीति गरिराखेका छन् । यसरी न्याय सम्पादनको प्रक्रियालाई खलल पुर्‍याउने दुस्साहस गर्दै छन् । सम्बन्धित निकायको ध्यान जाओस् । र फेरी पनि नैतिक रूपले पतित रविलाई नैतिकता कै प्रश्न, अनुसन्धानमा रहिरहेको विषयउपर भ्रम छर्न नलाग्नुहोस् , एउटा पूर्व गृहमन्त्रीलाई त्यो शोभा दिँदैन ।”