२० भाद्र, काठमाडौं । हिन्दु महिलाहरू आज तीज पर्वको पहिलो दिन दर खाएर मनाउदै छन् । नेपालीहरुले विशेषगरी आज माइतीपक्षले चेलीबेटीलाई बोलाएर दरका रूपमा विशेषगरी दूधबाट बनेका विभिन्न शुद्ध परिकार बनाएर खुवाउने प्रचलन छ ।
खिर, हलुवा, ढकनी, घिउ, दही, दूध, मिठाइ, फलफूललगायतका मिठा परिकारलाई दरको रुपमा खाने गरिन्छ ।
परापूर्वकालमा देवी पार्वतीले भगवान शिवलाई पतिको रुपमा पाउन निराहार व्रत बसेको र कामना पुरा भएको विश्वासका आधारमा राम्रो पति पाउन र विवाहितहरुले पतिको सुस्वास्थ्य, दीर्घायू र प्रगतिको कामना गर्दै व्रत बस्ने चलन रहेको छ ।
तिजको व्रत सक्नेले निराहार बस्ने भएकाले आज वर्तालुहरूले शक्ति प्राप्तिका लागि मीठा एवं आडिलो परिकार दरका रूपमा खाइ भोलिपल्टको व्रतका लागि पूर्व तयारी गर्ने गर्छन् । तिजमा निराहार व्रत बस्नुको साथै नाच्ने गाउने गर्ने हुनाले शक्ति आवश्यक पर्ने भएको कारणले दर खाने चलन रहेको पनि बताउछन् ।
महिलाहरूले वर्षदिनभर आफूलाई परेका दुःख, पिर, मर्कालाई पोख्ने पर्वका रूपमा समेत लिने गरिन्छ । गीतका माध्यमबाट यस्ता मर्कालाई महिलाले सार्वजनिक गर्दछन् ।
यस दिन परिवारका सबै सदस्यहरू, आफन्तहरू र साथीहरू सबैजना एक ठाउँमा भेला भएर भोजन गर्ने गरिन्छ । जसले पारिवारिक सम्बन्धलाई अझ प्रगाढ बनाउँछ । त्यसैले आजको दर खाने दिनलाई एकता र मेलमिलापको प्रतीकको रुपमा पनि लिइन्छ ।
