१५ असोज, काठमाडौं । ललितपुरमा अविरल वर्षाका कारण आएको बाढी र पहिरोमा परी मृत्यु भएका ६ जनाको शव फेला परेको छ ।
ललितपुरका एसएसपी शेखर खनालका अनुसार थप ६ जनाको शवसँग गरी हाल ललितपुरमा मृतकको संख्या ४० पुगेको छ ।
महांकाल गाउँपालिका–२ बस्ने ९ वर्षीय आयुष स्याङ्तान, महांकाल–२ स्थित ठोस्ने खोला बस्ने एकै परिवारका ४० वर्षीय राममाया स्याङतान, छोरा १४ वर्षीय अजय स्याङ्तान र अर्का छोरा ११ वर्षका सुवास स्याङतान र उनकी ९ वर्षीय छोरी सलिना स्याङ्तानको शव भेटिएको छ । महांकाल गाउँपालिका–३ गोटिखेलबाट बेपत्ता भएका ईश्वर तिमल्सिनाको पनि शव भेटिएको छ ।
बेपत्ता भएका १० जनाको खोजी भइरहेको एसएसपी खनालले जानकारी दिनुभयो । बेपत्ता भएकाहरू ललितपुर महानगर–१४ नखिपोटका ५ वर्षीय सेतु साह, ओखलढुङ्गा घर भएर ललितपुर बस्ने ४० वर्षीय देवराज कार्की, रौतहट घर भएर नखिपोट बस्ने ३२ वर्षीय बिकाउ साह, नाम नखुलेको ईश्वर तिमल्सिनाको आमा, महांकाल–३ गोटीखेल, ईश्वरको पत्नी गोम तिमल्सिना, गोदावरी नगरपालिका–६ आनन्दबन अस्पतालमा कार्यरत ३० वर्षीय विवेक सिंह, बागमती गाउँपालिका–१ घुसेल ५० वर्षीय केशव न्यौपाने, महांकाल–२ का १२ वर्षीय संजिता स्याङतान, ३५ वर्षीय छविलाल स्याङतान, महांकाल गाउँपालिका–२, छविलाल स्याङ्तानको भाउजू (नाम नखुलेको) छन् ।
विपद्मा परेर घाइते भएका ३ जनाको उपचार हुँदै छ ।
रौतहट घर भएर ललितपुर बस्ने ६ वर्षीय मेघना शाह, गोदावरी नगरपालिका–७ बस्ने ३४ वर्षीय ठुलीमाया रुम्बा र बामगति गााउँपालिका–४ बस्ने भूषण अर्यालको उपचार भइरहेको छ ।