काठमाडौंमा विश्व अहिंसा तथा गान्धी दिवस मनाइयो

१६ असोज, काठमाडौं । विश्वभर विश्व अहिंसा दिवस तथा १५५ औँ महात्मा गान्धी जयन्ती आज विभिन्न कार्यक्रम गरी मनाइँदै छ ।

गान्धी जयन्ती तथा विश्व अहिंसा दिवसका अवसरमा आज नेपाल काठमाडौंस्थित भारतीय राजदूतावासद्वारा आयोजना कार्यक्रममा नेपालका लागि भारतीय राजदूत नवीन श्रीवास्तवले दूतावास परिसरमा रहेको महात्मा गान्धीको शालीकमा माल्यार्पण गर्नुभयो । त्यसक्रममा उहाँले महात्मा गान्धीप्रति श्रद्धाञ्जली व्यक्त गर्नुभयो ।

कार्यक्रममा चर्चित ब्यान्ड सुरसुधाकी सरस्वती खत्रीले महात्मा गान्धीको समर्पणमा सांगीतिक प्रस्तुति दिनुभयो ।

यो दिवसको कार्यक्रममा नेपाल चर्खा प्रचारक गान्धी–तुलसी स्मारक महागुठीका सदस्यहरू पनि सहभागी थिए ।

संयुक्त राष्ट्र सङ्घको महासभाले सन् २००७ मा महात्मा गान्धीको जन्म दिनलाई विश्व अहिंसा दिवसको रूपमा मनाउने प्रस्ताव पारित गरेपछि हरेक वर्ष अक्टोबर २ का दिन यो दिवस मनाइन्छ । १५ जून २००७ मा महासभामा भारतद्वारा प्रस्तुत अहिंसा दिवस मनाउनेसम्बन्धी प्रस्तावलाई नेपाललगायत विश्वका १४० मुलुकले समर्थन गरेका थिए ।