४ कार्तिक, काठमाडौँ ।  आइतवार बागमती प्रदेश लोक सेवा आयोगको अध्यक्षमा महेश्वर श्रेष्ठ नियुक्त हुनुभएको छ । आयोगका सदस्य सुदर्शन ढकालले पदबाट राजीनमा दिएपछि बागमती प्रदेश अध्यक्ष दिपक प्रसाद देवकोटाले श्रेष्ठलाई लोक सेवा आयोग अध्यक्षमा नियुक्त गर्नुभएको हो । 

२ मंसिर २०७६ मा गठित आयोगको अध्यक्ष सुरेशमान श्रेष्ठ उमेर हदका कारण ३ चैत २०८० मा पदमुक्त भएपछि आयोगका सदस्य ढकालले नै कार्यवाहक अध्यक्षको जिम्मेवारी सम्हाल्नुभएको थियो । श्रेष्ठलाई आयोगको अध्यक्ष नियुक्त गर्न सिफारिस भएपछि आयोगका सदस्य ढकालले पदबाट राजीनामा दिनुभयो। कनिष्ट व्यक्तिलाई अध्यक्ष नियुक्त गर्न लागेको थाहा पाएपछि असन्तुष्टि जनाउँदै उहाँले शुक्रवार प्रदेश प्रमुख दिपकप्रसाद देवकोटा समक्ष राजीनामा दिनुभएको हो । ६ माघ २०७६ मा सदस्य नियुक्त हुनुभएको ढकालले ४ वर्ष ९ महिना काम गर्नुभयो । 

श्रेष्ठ नवलपरासी पूर्वको विनयी त्रिवेणी गाउँपालिका वडा नम्बर १ निवासी हुनुहुन्छ ।  लुम्बिनी प्रदेशको बुटवलस्थित स्वास्थ्य तालिम केन्द्रको निर्देशक पदमा कार्यरत श्रेष्ठ बिहीवार मात्रै सरकारी सेवाबाट अवकाश हुनुभयो ।  उहाँ ११औं तह सहसचिव हुनुहुन्छ ।  

उहाँलाई लोक सेवा आयोगको अध्यक्ष नियुक्त गर्न मुख्यमन्त्री बहादुर सिं लामा, सभामुख भुवनकुमार पाठक र विपक्षी दलका नेता शालिकराम जम्मकट्टेल सम्मिलित ३ सदस्यीय समितिले २१ असोजमा सिफारिस गरेको थियो ।