साउन १०, काठमाडौं । गुरुर्ब्रह्मा गुरुर्विष्णु गुरुर्देवो महेश्वरः । गुरुः साक्षात् पर ब्रह्म तस्मै श्री गुरवे नमः ।। यस पटक कोरोना भाइरस सङ्क्रमणको जोखिम कायमै रहेका कारण सामाजिक सञ्जाल तथा यदा–कदा सार्वजनिक कार्यक्रम गरेर गुरू पूर्णिमा मनाएको छ । साउन शुक्ल पूर्णिमाका दिन गायत्री, दीक्षा, वेद मन्त्र सुनाउने र शिक्षा दिने गुरुजनप्रति सम्मान भाव प्रकट गरी गुरु पूर्णिमा पर्व मनाउने गरिन्छ । गुरु पूर्णिमाका अवसरमा विगत वर्षमा औपचारिक कार्यक्रम आयोजना गर्ने गरिन्थ्यो । आ–आफ्नो गुरुलाई फोन, सामाजिक सञ्जालबाट सम्झने, कृतज्ञता ज्ञापन गर्ने तथा गुरू जिवित नभएकाहरूले गुरूको फोटोमा फूलमाला गरेर गुरु पूर्णिमा मनाएको छ । सामान्य रूपमा भौतिक दूरी कायम गर्दै स्वास्थ्य सुरक्षाका मापदण्ड अपनाएर औपचारिक कार्यक्रम पनि भएको छ । ‘गु’ को अर्थ अन्धकार र ‘रु’ भन्नाले प्रकाश बुझिन्छ । ज्ञानरुपी प्रकाशले अज्ञानरुपी अन्धकारको नाश गराउने व्यक्तिलाई गुरु भनिने तन्त्रशास्त्र र धर्मशास्त्रमा उल्लेख गरिएको छ । गुरुर्ब्रह्मा गुरुर्विष्णु गुरुर्देवो महेश्वरः । गुरुः साक्षात् पर ब्रह्म तस्मै श्री गुरवे नमः ।। माता पिताजस्तै गुरुलाई पनि देवता समान मानी ‘आचार्यदेवो भव’ भनिन्छ । गुरु पूर्णिमाका अवसरमा विभिन्न विद्यालय एवं संघ सस्थाले कार्यक्रम गरी शिक्षा, दीक्षा दिने गुरुप्रति श्रद्धाभाव प्रकट गर्ने गरेकामा यस वर्ष कोरोना भाइरस सङ्क्रमणबाट बच्न सार्वजनिक कार्यक्रम नभएकाले मानसिक रूपमा श्रद्धाभाव प्रकट गरिएको छ । गुरु पूर्णिमाको अवसरमा हिन्दु स्वयंसेवक संघ, नेपाल लगायतका विभिन्न संघ, संगठनहरूले गुरु पूर्णिमाको अवसरमा भग्वाध्वजलाई गुरू मानेर पूजन गर्ने गर्दै आइरहेको छ । पछिल्लो समय गुरु पूर्णिमाको व्यापकता छाउँदै गएको छ । गुरु पूर्णिमालाई शिक्षक दिन को रूपमा पनि मनाउने प्रचलन बढेको छ । शिक्षा क्षेत्रमा सँस्कार र सँस्कृतिको नकारात्मक बढी चर्चा हुने गरे पनि गुरु पूर्णिमालाई भने सकारात्मक रूपमा हेरिएको छ । समाजमा गुरु पूर्णिमा अर्थात् शिक्षाको महत्वलाई बुझ्न थालिएको हो की भन्न सकिन्छ ।