नेकपा एकीकृत समाजवादी दर्ता गर्न एमालेका ३० सांसद र ५४ केन्द्रीय सदस्यले गरे सनाखत
भदौ ९, काठमाडौं । नेकपा एकीकृत समाजवादी पार्टी दर्ताका लागि नेकपा एमालेका ३० सांसद र ५४ जना केन्द्रीय सदस्यहरुले सनाखत गरेका छन्।
नयाँ दल दर्ताका लागि बुधबार निर्वाचन आयोग पुगेर ५४ जनाले सनाखत गरेका आयोग स्रोतले जनाएको छ ।
सरकारले दल विभाजनका लागि २० प्रतिशत केन्द्रीय सदस्य वा संसदीय दलका सदस्य भए पुग्ने गरी अध्यादेश ल्याएपछि माधव नेपाल समूह एमाले छाडेर नयाँ पार्टी दर्ता गर्न गएको थियो ।
नेकपा एमालेले दल त्यागको कारबाही गरेका १४ सांसदमध्ये ९ जना सांसदले बुधबार नयाँ पार्टी दर्ताका लागि सनाखत गरेका छन् । उनीहरुको हस्ताक्षरलाई मान्यता दिने वा नदिने आयोगले टुंग्याउनुपर्नेछ ।
वरिष्ठ नेता झलनाथ खनालले भने दिल्लीबाटै भर्चुअल माध्यमबाट सनाखत गरेका छन्।
एकीकृत समाजवादीको पक्षमा रहेको भन्दै आयोगको कार्यालयमा पुगेका तीनजनाको सनाखत हुन सकेको छैन।
पार्टी दर्ताका लागि पेश गरेको निवेदनमा नाम र हस्ताक्षर नभएको भन्दै आयोगले शारदा भट्ट, माया ज्ञवाली र सोमप्रसाद पाण्डेको सनाखत गर्न नमानेको हो।उनीहरुका सम्बन्धमा के गर्ने भनेर आयोगका पदाधिकारी र एकीकृत समाजवादीका नेताहरुबीच अहिले छलफल चलिरहको छ।