झरही खोलाको बाढीले परासी बजार डुबानमा, एकजना बेपत्ता
भदौ ११, काठमाडौं । बिहीबार रातिदेखि परेको भारी वर्षाका कारण नवलपरासी पश्चिमको सदरमुकाम परासी बजार डुबानमा परेको छ। परासी हुँदै बगेको झरही नदीमा पानी अत्यधिक बहाव हुँदा र रावण खन्डा खोलाको बाढी बजारमा पस्दा डुबान भएको हो ।
सुनवल नगरपालिका वडा नं. ४ का एक जना १४ वर्षीय किशोर बेपत्ता भएका छन् । बस्तीमा बाढी पसेकाले उनी बाढीमा बगेको आशंका प्रहरीले गरेको छ ।
बाढी पसेर बजारको अधिकांश स्थान जलमग्न भएको छ । बजारका सयौं घरहरु डुबानमा परेका छन् । डुबानले परासी बजारका रामग्राम नगरपालिकाको वडा नंं. १ को सहुवाटिकर, वडा नंं.२ को मस्जिद टोल, हाटबजार टोल, वडा नंं. ३ को सङ्गम टोल, मालटोल, लोकतान्त्रिक टोल, वडा नंं ५ को प्रशासन टोल ड्राइभ टोल, इमली टोल, बुद्ध चोक टोल र वडा नंं. ६ पोखरापाली टोल पुरै डुबानमा परेका नगर प्रमुख नगेन्द्र गुप्ताले जानकारी दिएका छन् ।
बाढीले जिल्ला प्रशासन कार्यालय, जिल्ला प्रहरी कार्यालय र सैनिक ब्यारेकसहित विभिन्न सरकारी कार्यालयहरूमा पनि २ देखि ५ फिटसम्म बाढीको पानी पसेर डुबानमा परेको जिल्ला प्रहरी कार्यालयका प्रहरी नायब उपरीक्षक राजु लामाले जानकारी दिएका छन् ।
वर्षा नरोकिएका कारण बाढी र डुबानले पुर्याएको क्षतिको विवरण संकलन गर्न नसकिएको डीएसपी लामाले बताएका छन् । परासीका स्थानीय बासिन्दा एवं नेपाल पत्रकार महासंघका जिल्ला अध्यक्ष हरि शर्माका अनुुसार घर भित्रै बाढी पसेका कारण एक तले घर हुने कैयौं परिवारले वर्षाकै बीच घरको छतमा रात कटाउन बाध्य भएका छन् ।
बेपत्ता भएका १४ वर्षीय किशोरको खोजीकार्य भइरहेको प्रहरीले जनाएको छ ।