भदौ ३०, काठमाडौं । वीरेन्द्रनगर– सुर्खेतका स्वास्थ्य संस्थाहरुमा औषधी अभाव हुन थालेको छ। यहाँका अधिकांश स्वास्थ्यचौकीमा पखालाका बिरामीलाई दिइने जिन चक्कीको अभाव भएको छ। स्वास्थ्यकर्मीहरुले छ महिना यता जिन चक्कीको अभाव रहेको र स्वास्थ्यचौकी आउने बिरामी जिन चक्की नहुँदा चर्को मूल्य तिरेर निजी स्वास्थ्य संस्थामा उपचार गर्न बाध्य भएका जानकारी दिएका छन् । सुर्खेतको रामघाटस्थित स्वास्थ्यचौकीका वरिष्ठ स्वास्थ्य सहायक धिरेन्द्र घर्तीले ५ ६ महिना पखलाका बिरामीलाई खुवाउने जिन चक्कीको अभाव रहेको बताए । स्वास्थ्यचौकीमा आइरन चक्की र परिवार नियोजनका साधनको समेत अभाव हुने गरेको छ। यस्तै भेरीगङ्गास्थित छिन्चु स्वास्थ्यचौकीमा समेत जिन चक्की अभाव भएको बरिष्ठ स्वास्थ्य सहायक गोकर्ण बुढाले जानकारी दिए। एक वर्षदेखि जिन चक्कीको अभाव रहेको उनले बताए। जिन चक्कीको अभाव भएपछि बिरामी मर्कामा परेका छन्। स्वास्थ्यचौकीले उपलब्ध गराउने ४२ प्रकारका निःशुल्क औषधीमध्ये आधाजसो मात्र स्वास्थ्यचौकीमा उपलब्ध हुने गरेको उनले बताए। त्यसैगरी स्वास्थ्यचौकीमा ग्याष्टिक, छाला, कानको समस्या भएका बिरामीलाई उपलब्ध गराइने औषधिसमेत अभाव भएको रहेको बुढाले बताए। रामघाट र छिन्चुमा मात्र होइन जिल्लाका अधिकांश स्वास्थ्यचौकीमा औषधिको अभाव भएको छ। छिन्चु स्वास्थ्यचौकीका वरिष्ठ स्वास्थ्य सहायक बुढाका अनुसार यहाँ अभाव हुँदा कतिपय औषधि स्वास्थ्य संस्था आफैँले खरिद गर्ने गरेका छन्। यस्तै भरीगङ्गा स्वास्थ्य शाखाले सङ्घबाट खरिद भएर आउने औषधी समयमा नआउँदा औषधीको अभाव भएको जनाएको छ। ‘स्वास्थ्य शाखाका जनस्वास्थ्य निरीक्षक अर्जुन चपाईका अनुसार केन्द्रले खरिद गरेर पठाउने नौ प्रकारको औषधी अभाव भएको र जिन चक्कीका साथै परिवार नियोजनका साधनको समेत अभाव छ । जनस्वास्थ्य कार्यालयलाई औषधी अभावको विषयमा पटक पटक जानकारी गराइएको उनले बताए। यसैबीच केही दिनअघि सुन्दर नेपाल संस्थाको पारस्परिक जवाफदेहिता परियोजनाअन्तर्गत गठन गरिएको निगरानी समूहले स्वास्थ्यचौकीको अनुगमन गरेको थियो। अनुगमनका क्रममा स्वास्थ्यचौकीहरुमा अत्यावश्यक औषधिको अभाव रहेको पाइएको परियोजनाका कार्यक्रम संयोजक याम थापाले जानकारी दिए।