‘क्यानोपी’ पर्यटनको अवधारणा सौराहामा
८ फागुन, काठमाडौँ ।
चितवनको पर्यटकीय नगरी सौराहामा ‘क्यानोपी’ पर्यटनको अवधारणा अघि बढाइएको छ । सौराहाको निकटमा रहेको बाघमारा मध्यवर्ती सामुदायिक वनमा क्यानोपी पर्यटकको अवधारणा बागमती प्रदेश सरकारले अघि बढाएको हो ।
सामुदायिक वनभित्रको कोर एरियामा झोलुङ्गे पुलको आकारमा क्यानोपी निर्माण गरिने छ र वनको बूढीराप्ती र राप्ती नदीको सँगम स्थलनजिक निर्माण हुने क्यानोपीबाट पर्यटकले वन्यजन्तु अवलोकन गर्न पाउनेछन् । क्यानोपी निर्माणको लागि प्रदेश सरकारले डिपिआर तयार गरिरहेको वनका अध्यक्ष जीतु तामाङले जानकारी दिएका छन्।
चितवन राष्ट्रिय निकुञ्ज, राष्ट्रिय प्रकृति संरक्षण कोष र सामुदायिक वनको पहलमा वातावरण तथा वन्यजन्तुमैत्री क्यानोपी निर्माण हुनेछ । तीन /चार महिनामा डिपिआर तयार गर्ने र अबको डेढ वर्षभित्र सञ्चालनमा ल्याउने गरी अवधारणा अघि बढेको अध्यक्ष तामाङले बताए ।
सौराहाको पर्यटन वन्यजन्तुमा आधारित छ । पशु अधिकार र जनावरलाई दुःख दिन हुन्न भन्ने मानसिकताको विकाससँगै सौराहा आउने पर्यटकहरुले हात्ती सफारी गर्न छाडेका छन् । सौराहामा आउने कुल पर्यटकमध्ये २५ प्रतिशत पर्यटकले मात्र हात्ती सफारी गर्ने गरेको आकलन गर्न थालिएको छ । हात्ती सफारीको विकल्पका लागि नभई पर्यटकलाई नयाँ स्वाद दिन क्यानोपी वाकको अवधारणा ल्याइएको वनका अध्यक्ष तामाङले बताए ।२५ फिट अग्लो क्यानोपीको लम्बाइ एक किलोमिटर हुनेछ । बीचबीचमा पर्यटकलाई थकाइ मार्न छवटा प्राकृतिक मचान निर्माण हुनेछ । सिमलको रुखमा मान्छेले वन्यजन्तु देख्ने र वन्यजन्तुले मान्छेलाई नदेख्ने गरी मचान निर्माण हुनेछ ।
‘नेपालमै पहिलोपटक क्यानोपी निर्माण हँुदैछ’, उनले भने, ‘यसले चितवनमा पर्यटक भित्र्याउन मद्दत गर्नेछ । छिमेकी मुलुक भारतसहित मलेसिया र युरोपियन मुलुकहरुमा क्यानोपी वाक सफल भएका छन् । नेपालमा पहिलोपटक चितवनमा यो सञ्चालनमा आउँदै छ । क्यानोपी वाकले सामुदायिक वनको आम्दानी बढ्नुका साथै चितवनको पर्यटन प्रवद्र्धनमा समेत सहयोग मिल्ने छ ।
‘कोरोनासँग जुध्दै अघि बढेको सौराहालाई पुरानै लयमा फर्काउन नयाँनयाँ कार्यक्रम आवश्यक छ’, क्षेत्रीय होटल संघ चितवनका अध्यक्ष दीपक भट्टराईले भने, ‘सरकारसँग सहकार्य गरी घुमाँै सौराहा अभियान सञ्चालन गर्ने सोच बनाइएको छ ।’क्यानोपी वाक सौराहामा पर्यटक भित्र्याउने गतिलो माध्यम बन्न सक्ने भन्दै उनले यसलाई छिट्टै सञ्चालनमा ल्याउनुपर्ने धारणा राखे । सौराहाको पर्यटन उद्योगलाई माथि उठाउन स्वदेशी तथा विदेशी पर्यटकले रूचाउने खालका गतिविधि सञ्चालन गर्न जरूरी देखिएको उनको भनाइ छ ।