फागुन ९, बीबीसी । टेस्ला कम्पनीका मालिक एलन मस्कले स्थापना गरेको वैज्ञानिक फर्म न्युरालिंकले अहिले हाम्रो मस्तिष्कलाई कम्प्युटरसँग जोड्ने डिभाइस निर्माण गरिरहेको छ । र यसमा उनले जनावरहरुमा परीक्षण गर्दा तिनीहरुप्रति कुनै क्रुरता नअपनाइएको दाबी गरेका छन् । अघिल्लो हप्ता मात्र अमेरिकी कृषि विभागले यो प्रविधिका लागि परीक्षण गर्न प्रयोग गरिएका जीवजन्तुहरुसँग यातनापूर्ण व्यवहार गरिएको भन्ने आरोप लगाएको थियो । यसपछि आफ्नो ब्गलमा न्युरालिंकले संलग्न सबै जीवजन्तुसँग सम्भव भएसम्मको मानवीय र नैतिकतापूर्ण व्यवहार गरिएको जनाएको छ । फर्मले यही वर्षको अन्त्यदेखि मान्छेमा ट्रायल सुरु गर्ने पनि बताएको छ । यसै आरोपको जवाफमा पोस्ट गरिएको सो ब्लगमा जीव कल्याणप्रति आफूहरु एकदमै संवेदनशील रुपमा प्रतिबद्ध रहेको उल्लेख गरेको छ । यसमा लेखिएको छ, “हाम्रो मुख्य लक्ष्य भनेको जीवजन्तुको ख्याल राखिने किसिमले कार्यक्रमहरु डिजाइन गर्नु हो जसले तिनका आवश्यकताहरुलाई प्राथमिकतामा राख्नेछ र केबल मान्छे मात्रको सहजता हेर्दैन । त्यसैले यहाँ प्रयोग गरिने प्रत्येक जीवजन्तुबारे ध्यानपूर्वक प्लान गरिएको हुन्छ । हामीले यसमा वैज्ञानिक आविस्कार र जीवजन्तुहरुको नैतिक प्रयोगलाई सन्तुलित राखेरै सबै काम गरिरहेका छौँ । रिसर्चको सुरुवातमा न्युरालिंकले जीवजन्तु व्यवस्थापन सम्बन्धी डेभिस नेस्नल प्राइमेट रिसर्च सेन्टसँग सहकार्य गरिरहेको थियो तर पछि यसले वर्तमान स्तरमा सुधार ल्याउन बाँदरहरलाई राख्न आफ्नै स्थल निर्माण गरेको हो ।