१२ फागुन, काठमाडौं । निर्वाचन आयोगले स्थानीय तह निर्वाचन, २०७९ का लागि कर्मचारी बीमा प्रक्रिया सुरु गरेको छ । एक लाख १० हजार ७१३ जना आयोगका पदाधिकारी तथा निर्वाचनमा खट्ने कर्मचारीका लागि २० लाख बीमा प्रस्ताव आह्वान गरेको आयोगले जनाएको छ । फागुन १६ गतेभित्र आइपुग्ने गरी बीमा कारोबार गर्ने संस्थाबाट प्रस्ताव आह्वान गरिएको निर्वाचन आयोगका प्रवक्ता शालिग्राम शर्मा पौडेलले जानकारी दिनुभएको छ । निर्वाचनमा मतदान, मतगणना र अन्य प्राविधिक कार्यका लागि मात्रै करिब दुई लाख ५० हजार कर्मचारी नियुक्त हुनेछन् भने स्वयंसेवीले बीमाको सुविधा नपाउने भएका छन् । आयोगका प्रवक्ता पौडेलका अनुसार, आयोगका पदाधिकारी तथा केन्द्रीय कार्यालय, प्रदेश र जिल्ला निर्वाचन कार्यालयका कर्मचारीको हकमा १०४ दिनका लागि बीमा गर्नुपर्ने अवधि तय गरेको छ । तीनवटै संरचनाका करिब नौ सय कर्मचारीको बीमा गरिनेछ । आयोगका सहायक प्रवक्ता सूर्यप्रसाद अर्यालका अनुसार निर्वाचनमा खटिने कर्मचारीको जनही २० लाख रुपियाँको बीमा हुनेछ । निर्वाचन आयोग ऐन, २०७३ को दफा ३६ ले आयोगले निर्वाचनको काममा संलग्न पदाधिकारी, कर्मचारी वा शिक्षकको निर्वाचन अवधिभर हुने दुर्घटनाका लागि बीमा गरिदिनुपर्ने उल्लेख छ । प्रवक्ता पौडेलले ‘सरकारी बीमा संस्थानमार्फत नै कर्मचारीको बीमा गर्न कानुनी अड्चन नरहे पनि स्पर्धी र खर्चमा मितव्ययी हुन सार्वजनिक रूपमा प्रस्ताव आह्वान गरिएको’ बताउनुुभयो ।आयोगका अनुसार मुख्य निर्वाचन अधिकृत र निर्वाचन अधिकृतको कार्यालयमा खट्ने छ हजार ७७७ जना कर्मचारीका लागि ७० दिन, मतदान केन्द्रमा खट्ने ९४ हजार कर्मचारीका लागि १५ दिन र मतगणनामा खटिने नौ हजार ३६ जना कर्मचारीका लागि १० दिनका लागि बीमा गर्नुपर्नेछ ।