बोलेको कुरालाई जस्ताको तस्तै लेखनमा उतार्ने सजिलो तरिका
१२ फागुन, काठमाडौं ।
काठमाडौं । बोलिरहेको कुरालाई उत्तिखेरै जस्ताको तस्तै लेखनमा उतार्न एप स्टोर तथा प्ले स्टोरमा धेरै विकल्प छन् । तर, ती सबैजसो विकल्पका लागि तपाईंले पैसा तिर्नुपर्ने हुन्छ । बोल्दा बोल्दै अथवा बोलेका कुरालाई कम्प्युटरमा सिधै ट्रान्सक्राइब अर्थात लेख्न सकिने टुल गुगलले पनि ल्याएको छ । त्यो पनि निःशुल्क ।
पैसा तिरेर प्रयोग गर्ने एपमा जस्तो धेरै फिचर नभएता पनि गुगलको ट्रान्सक्राइभ टुल पछिल्लो समय निकै चर्चामा रहेको छ । त्यसैले यहाँ हामी तपाईंलाई उक्त टुलको प्रयोग कसरी गर्ने भन्ने विषयमा जानकारी दिँदै छौं ।
गुगलले यो टुल गुगल डक्समा उपलब्ध गराएको छ । जसमार्फत तपाईं कुनै पनि भिडियो, अडियो अथवा लाईभ कन्फ्रेन्समा हुने कुराकानीलाई ट्रान्सक्राइब गर्न सक्नुहुनेछ ।
उक्त टुल प्रयोग गर्न यस्तो प्रक्रिया अपनाउनु पर्नेछ
१। सुरुमा गुगल डक्स खोल्नुहोस् ।
२। त्यहाँ रहेको ‘tool’ भन्ने अप्सनमा गएर ‘voice typing’ मा क्लिक गर्नुहोस् ।
३। त्यहाँ विभिन्न भाषाको विकल्प रहेको हुन्छ । त्यसमध्ये नेपाली, अंग्रेजी कुन भाषामा ट्रान्सक्राइब गर्न चाहनुहुन्छ, छनोट गर्नुहोस् ।
४। यदि त्यहाँ देखाइएको अप्सनमा तपाईंले प्रयोग गर्ने भाषा नभएको खण्डमा त्यसको सँगै रहेको ‘माइक्रोफोन’ आईनमा क्लिक गर्नुहोस र त्यहाँबाट भाषा छनोट गर्नुहोस ।
५। यति गरेसँगै अब तपाईंले रकर्ड गर्न सक्नुहुनेछ । त्यसका लागि तपाईंले तल रहेको रेकर्डरको आइकनमा क्लिक गर्नुहोस । त्यहाँ क्लिक गर्दा उक्त माइक्रोफोनको आइकन रातो हुनेछ ।
नोटः तपाईंले ट्रान्सक्राइब सुरु गरेपछि गुगल डक्स छोड्न पाउनु हुने छैन । यदि तपाईंले गुगल डक्सको फाइल बन्द गरेर अन्त गएको खण्डमा तपाईंको ट्रान्सक्राइब रोकिने छ ।