आजबाट संघीय संसद्का उपसभामुख र उपाध्यक्ष दुवै पद रिक्त
फागुन २०, काठमाडौँ । संघीय संसद् अन्तर्गतका प्रतिनिधिसभाका उपसभामुख र राष्ट्रियसभा उपाध्यक्षसहित दुबै पद रिक्त हुन पुगेका छन्।
तत्कालीन उपसभामुख शिवमाया तुम्वाहाङ्फेले ०७६ माघ ६ गते राजीनामा दिएपछि पदपूर्ति हुन नसकिरहेका बेला राष्ट्रियसभा उपाध्यक्ष शशीकला दाहालको चार वर्षे पदावधि फागुन २० मा स्वतः सकिएकाले दुवै पद रिक्त हुन पुगेका हुन्। ‘यौन प्रकरण’ मामिलामा मुछिँदा तत्कालीन सभामुख कृष्णबहादुर महराले नैतिकताका आधारमा राजीनामा दिएपछि तुम्वाहाङ्फेले सभामुख हुने इच्छा प्रकट गरे पनि तत्कालीन नेपाल कम्युनिष्ट पार्टीको सत्ता गठबन्धनमा देखा परेको असमञ्जस्यका कारण सो पद प्राप्त गर्न सकेकी थिइनन्। एउटै पार्टीको सभामुख र उपसभामुख हुन नसक्ने संवैधानिक व्यवस्थाका कारणले समेत सभामुखमा इच्छुक तुम्वाहाङ्फेलाई अन्ततः संघीयमन्त्री बनाउने शर्तमा राजीनामा दिन लगाइएको थियो।
दुई वर्षअघि नै उनले सो राजीनामा दिएको भए पनि संघीय संसद्का राजनीतिक दलबीच सहमति हुन नसक्द सो पद रिक्त हुँदै आएको थियो। उपसभामुख पद दुई वर्षदेखि रिक्त भइरहेका बेला आजबाट राष्ट्रियसभा उपाध्यक्षको पद पनि रिक्त हुन लागेको हो। राष्ट्रियसभाका नवनिर्वाचित सांसदले गोलाप्रथामार्फत आफ्नो कार्यकाल चयन गर्नुपर्ने संवैधानिक बाध्यताका कारण ०७५ असार ४ मा भएको ‘निर्वाचन प्रक्रिया’ को क्रममा उपाध्यक्ष दाहालले चार वर्षे कार्यकाल चयन गरेकी थिइन्। उपाध्यक्ष दाहालले चिठ्ठामार्फत् चयन गरेको कार्यकाल आजै अर्थात् २० फागुनमा सकिने भएपछि सो पद स्वतः रिक्त हुन लागेको हो। उनीसँगै आजैबाट २० सांसदको पद पनि स्वतः रिक्त हुँदैछ।