आदिवासी जनजाति महासंघको अध्यक्षमा शेर्पा विजयी
चैत ११, काठमाडौं । आदिवासी जनजाति महासंघको अध्यक्षमा गेल्जे लामा शेर्पा विजयी हुनुभएको छ ।
बिहिबार राति सम्पन्न निर्वाचनमा सोनाम लामा बालुङ्गलाई पराजित गर्दै शेर्पा विजयी हुनुभएको हो । अधिवेशनमा एमाले र कांग्रेस गठबन्धन बनेको थियो । अध्यक्षमा गेल्जे लामा शेर्पा कांग्रेस प्यानलबाट निर्वाचित हुनुभएको छ । त्यस्तै, महासचिवमा एमालेबाट निर्वाचित हुनुभएको हो । एमाले, कांग्रेस एकातिर र माओवादी, संघीय समाजवादी अर्कोतिर गरी गठबन्धन बनेको थियो । बिहिबार राति सम्पन्न निर्वाचनमा २१ जना पदाधिकारी अध्यक्ष र महासचिवमा मात्रै मतदान भएको थियो ।
वरिष्ठ उपाध्यक्षमा बुद्ध घर्ति, उपाध्यक्षहरु युवराज जिरेल, ध्यानी उराव, क्षेत्रबहादुर थकाली, गम्भीरसिंह गुरुङ भोटे, लाक्पा शेर्पा, लहरी जिमी र श्रुति कुमाल निर्वाचित भएका छन् । महाधिवेशनबाट उपमहासचिवमा रामकृष्ण लामा ब्लोन तामाङ चुनिएका छन । ८ जना सचिव निर्विराध निर्वाचित गरेको महाधिवेशनले विमल सारु मगरलाई कोषाध्यक्षमा चयन गरेको छ भने रिदार नोसाङ भोटे सहसचिवमा निर्विरोध भएका छन् ।
उपमहासचिव रामकृष्ण लामा, कोषाध्यक्ष विजय शारु मगर र ८ जना सचिवसहित केन्द्रीय सदस्यहरु निर्विरोध चयन भएका छन् ।
महाधिवेशनमा सहभागी नेता इन्द्र फाल मगरका अनुसार अध्यक्षमा शेर्पाले ४४ मत र प्रतिद्वन्द्वी सोनम लामा ८ मत पाएका थिए । अध्यक्षमा २ मत र उपाध्यक्षमा ३ मत बदर भएको थियो । त्यसैगरी महासचिवमा एमालेका तर्फबाट उम्मेदवार दिवस राईले ३६ मत र प्रतिस्पर्धी सुखवीर धामीले १५ मत पाएका थिए । नेपालमा आदिवासी जनजातिका ५९ जातजाति सूचिकृत रहेको छ । ती मध्ये ५४ जातजातिका एक एक जना प्रतिनिधि मतदाता रहने व्यवस्था छ । महाधिवेशनमा ५४ जातजातिका प्रतिनिधि सहभागी थिए । महाधिवेशनमा पदाधिकारी नपाएको भन्दै थारु समुदायका मतदाताले बहिस्कार गरेको बताइएको छ ।