वैशाख २८, काठमाडौं । बैशाख ३० गते हुने स्थानीय तह निर्वाचनका लागि मंगलबार मध्यरातिबाट मौनअवधि सुरु भएको छ । मौन अवधिलाई ध्यानमा राखी अझ बढी निगरानी बढाएको आयोगले जनाएको छ । आयोगले मौनअवधि सुरु हुनु केही घण्टाअघि आयोजना गरेको पत्रकार सम्मेलनमा प्रमुख निर्वाचन आयुक्तले आचारसंहिता कार्यान्वयनको सूक्ष्म रूपमा अनुगमन भइरहेको जानकारी दिए । पत्रकार सम्मेलनमा प्रवक्ता शालिग्राम शर्मा पौडेलले आचारसंहिता उल्लङ्घनका घटनामा तत्काल कारबाही गर्न सक्नेगरी विभिन्न संवेदनशील स्थानमा १९ वटा उच्चस्तरीय टोली परिचालन गरिएको बताए । उनका अनुसार अनुगमन हेर्ने आयुक्तको संयोजकत्वमा केन्द्रीय अनुगमन समिति, जिल्लामा मुख्य निर्वाचन अधिकृतको संयोजकत्वमा जिल्ला आचारसंहिता अनुगमन समिति र स्थानीय तहमा जिल्ला निर्वाचन अधिकृतको संयोजकत्वमा स्थानीय तह आचारसंहिता अनुगमन समिति गठन गरिएको छ । प्रमुख आयुक्त दिनेश थपलियाले आचारसंहिताबारे मौन अवधिमा अपनाइने नीतिको जानकारी गराएका थिए । निर्वाचन आचारसंहिता उल्लङ्घनका २०५ वटा विभिन्न क्रियाकलाप भएको आयोगले जनाएको छ । तीमध्ये ५३ वटामा स्पष्टीकरण सोधिएको प्रमुख निर्वाचन आयुक्त थपलियाले बताए । मौन अवधिमा उम्मेदवार, दलका कार्यकर्ताका क्रियाकलापमाथि निगरानी राख्न आयोगले मुख्य निर्वाचन अधिकृत, निर्वाचन अधिकृत तथा सबै स्थानीय प्रशासनलाई आयोगले निर्देशन दिइएको जनाएको छ ।