पराजित उम्मेदवारलाई काँधमा बोकेर खुशी साटे विजयी उम्मेदवारले, समाजका लागि बन्यो उदाहरण
जेष्ठ ६ काठमाडौँ ।
गुरु र शिष्य बीच भएको प्रतिस्पर्धामा शिष्य विजयी भएका छन् । आफू विजयी भएपछि आफ्नो गूरुलाई उच्च सम्मान दिदैँ गुरुबाट अर्शिवाद पनि लिएकाछन । तर चुनावमा विजयी भएपछि हारेको उम्मेद्वारलाई विभिन्न किसिमबाट होच्याउने गलीगर्ने प्रचल रहेको बेला यो सबैका लागि उदाहरणीय बनेको छ । यो संस्कार सवैले अवलम्बन गर्ने हो भने मात्र समाज साच्चिकै परिवर्तन हुन्छ ।
हेटौंडा–५ को वडा अध्यक्षमा सत्ता गठबन्धनको तर्फबाट काँग्रेसले हयगृव आचार्यलाई उम्मेदवार बनायो भने एमालेले सुशील घिमिरेलाई उम्मेदवार बनायो । जसमा घिमिरेले बाजी मारे । लामो समय वैदेशिक रोजगारमा गएर आएका घिमिरे काँग्रेसका उम्मेदवार आचार्यका शिष्य हुन् । उनै घिमिरेले आफनै विद्यालय तहको गुरू आचार्यलाई स्थानीय तह निर्वाचनमा पराजित गरेका हुन् । घिमिरेले २ हजार ५३० मत ल्याउँदै वडा अध्यक्षमा निर्वाचित भएका हुन् । उनका प्रतिस्पर्धी गठबन्धनबाट कांग्रेसका हयग्रीव आचार्यले १ हजार ३९० मत ल्याए । घिमिरेले आधारभूत तहको शिक्षा आचार्यबाट पाएका थिए ।आचार्यले २०४० सलादेखि २०४५ सम्म हेटौंडा–५ स्थित बालज्योति माध्यमिक विद्यालयमा आर्चाय शिक्षक थिए । सोही विद्यालयमा घिमिरेले कखरा सिकेका थिए । घिमिरेको शैक्षिक यात्रा प्रारम्भ आचार्यले नै गराएका थिए ।
कक्षा १ देखि ५ सम्म घिमिरे अध्ययन गर्ने विद्यालयको गुरु रहेका आचार्यको सरुवा भयो र उनको बढुवा भयो र मकवानपुरको थाहा नगरपालिका चित्लाङको विद्यालयमा दरवन्दी कायम भयो भने पछि हेटौंडा–१० स्थित ज्ञानोदय माध्यमिक विद्यालयमा पुग्यो । शान्त, थोरै बोल्ने र नेतृत्व क्षमता भएका घिमिरेले विद्यालयमा अनुशासित छात्रको रुपमा परिचित थिए । कक्षा कोठामा पनि नेतृत्वदायी भूमिका निर्वाह गर्ने र सबैलाई आदर सम्मान गर्ने उनको बानी रहेको आचार्य बताउँछन् ।
त्यसपछि भने उनीहरुको औपचारिक शैक्षिक गुरु चेलाको सम्बन्ध माथि पूर्णविराम लाग्यो । तर, हेटौंडा–५ निवासी आचार्य र घिमिरेबीच व्यवहारिक गुरु चेलाको सम्बन्ध भने कायमै रह्यो । विद्यालयमा औपचारिक रुपमा शिक्षक रहँदा पनि आचार्य कसैलाई पिट्ने, गालीगलौज नगरि अध्यापन गराउने गरेको घिमिरे बताउँछन् । ‘सानामा हामीले बदमासी गर्दासमेत गुरुले हामीलाई गाली गर्ने काम गर्नुभएन’ घिमिरेले भने, ‘हामीलाई माया गरेर सम्झाउने काम गर्नुहुन्थ्यो । पठाउने शैली पनि सरल थियो । सबैले बुझ्ने शैलीमा उहाँले पठाउनुहुन्थ्यो ।’
उनले शिक्षण संस्थामामात्र नभइ कतै भेट्दा पनि आफूहरुलाई व्यवहारिक ज्ञान दिने गरेको स्मरण गरे । समस्याहरु पर्दा त्यसको समाधान गर्ने उपायहरु आचार्यले दिने गरेको उनले बताए । अन्तर्राष्ट्रिय स्तरको बक्सिङ खेलाडी समेत रहेका घिमिरे स्थानीय रुपमा विकासका काममा सक्रिय रहेका छन् । उनकै पहलमा तत्कालीन हेटौंडा–५ का वडा अध्यक्ष राजेश बानियाँको सहयोगमा हेटौंडा–५ मा पिप्ले क्याम्प मिनी रंगशालासमेत निर्माण गरिएको छ ।
सुशील भन्छन्, ‘चुनाव एउटा प्रतिस्पर्धा हो । त्यसमा मैले जिते मेरो गुरु पराजित हुनुभयो । यो अवस्थामा मलाई आफ्नो बुबालाई पराजित गरेको अनुभव भएको छ । सुरुमा पार्टीले टिकट दिँदा गुरुको उम्मेदवारीका बारेमा कुनै चर्चा नै थिएन । तर एकाएक गुरु बा उम्मेदवारको रुपमा प्रस्तुत भएपछि भने म झस्किएँ । आफ्नै घरभित्र कसरी प्रतिस्पर्धा गर्ने दोधार भयो ।’ उनले त्यसलाई एउटा संकटको घडीको रुपमा लिएको बताए । उनले भने ‘जिते पनि हारे पनि चोट आफूलाई लाग्ने भयो । तर, आफ्नो जिम्मेवारीबाट पछि हट्न हुँदैन भनेर गुरुले नै सिकाउनु भएको हो । त्यसैले पार्टीको जिम्मेवारीलाई स्वीकार गरेर अभियानमा लागेँ ।’
निर्वाचनको परिणाम आएसँगै उनले आफ्नो जितको खुशी गुरु आचार्यसँग बाँडे का हुन्। उनले आचार्यलाई काँधमा बोकेर विजय र्यालीसमेत गरे । आगामी दिनमा आफ्नो क्षेत्राधिकारमा रहेर पक्षपात नगरी वडाको नागरिकको सेवामा लाग्ने उनले बताए । पार्टीको जिम्मेवारीमा रहे पनि वडाका नागरिकको सेवालाई प्राथमिकतामा राखेर अघि बढ्ने उनले बताए । आफ्नो जनप्रतिनिधिको यात्राभर प्रतिस्पर्धीको रुपमा रहेका आचार्यलाई मुख्य सल्लाहकारको भूमिकामा राखेर हरेक कामहरु सम्पादन गर्ने उनी बताउँछन् । यता गुरु आचार्यले आफ्नै चेलासँग पराजित हुँदा खुशी व्यक्त गरे । ‘सुशील मेरो चेला हो । आफूलाई उछिनेर मेरै चेला विजयी भएकोमा खुशी छु । उसले हाम्रो वडाको लागि राम्रो काम गर्छ । म ढुक्क छु,’ उनले भने ‘चुनाव एउटा प्रतिस्पर्धा हो । त्यसमा हार जित हुनु स्वभाविक प्रक्रिया हो । मैले हारेँ । मेरो चेलो अब्बल भएछ ।’