१५ जेष्ठ, काठमाडौँ । आर्थिक वर्ष २०७९ र ८० को बजेट भाषण अर्थमन्त्री जनार्दन शर्माले घोषणा गरेको भोलिपल्ट सोमबार सेयर बजार ५० अंकले घटेको छ । सो अंकको गिरावटपछि नेप्से २१७८ अंकमा कायम भएको छ । १ अर्ब ३३ करोड रुपैयाँको सेयर कारोबार भएको छ । बजेटबाट सेयर बिक्रीमा लाग्ने पुँजीगत लाभकर घट्ने केहीको अनुमान थियो । तर सो विषयलाई बजेटमा सम्बोधन गरिएन । सेयर बजारका सम्बन्धमा पुरानै कार्यक्रम दोहोरिए, जसले गर्दा आजको बजार गिरावटलाई थप असर परेको जानकार बताउँछन् । सोमबार ५ कम्पनीको मूल्य बढ्दा १८७ को घट्यो भने २ को स्थिर रह्यो । सबै उपसमूहका सूचक घटेका छन् । बैंकिङ ३१, विकास बैंक ९७, फाइनान्स ३९, होटल तथा पर्यटन ३८, जलविद्युत ६७, जीवन बीमा ३०६, उत्पादन १२७, माइक्रोफाइनान्स ७१, निर्जीवन बीमा २४८, अन्य ४६ र ब्यापार उपसमूह ६२ अंकले घटे । बलेफी हाइड्रोको मूल्य १० प्रतिशत बढ्यो । उपकार लघुवित्तको मूल्य ८ प्रतिशत बढ्यो । नेपाल इन्भेष्टमेन्ट बैंकको मूल्य १० प्रतिशत नै घटेको छ । सो बैंकको मूल्य प्रतिकित्ता ३६७.७० मा झर्दा पनि बिक्रीतर्फ चाप परेकाले केही दिन मूल्य घट्ने संकेत देखिएको छ । ज्योति लाइफ इन्स्योरेन्स, लाइफ इन्स्योरेन्स कर्पोरेसनको मूल्य ७ प्रतिशत घट्यो । कारोबार रकमका आधारमा नेपाल टेलिकम, अरुणभ्याली, हिमालयन डिस्टिलरी, एनआइसी एसिया बैंक र नबिल बैंक क्रमशस् अगाडि रहे ।