साइबर ब्यूरोमा अख्तियारको छानबिन
जेठ २४, काठमाडौं । नेपाल प्रहरीका केही ठेक्कामा अख्तियार दुरुपयोग अनुसन्धान आयोगले छानबिन थालेको छ । अख्तियारको छानबिनपछि केही ठेक्का त रद्द नै भइसकेका छन् ।
प्रहरीको साइबर ब्यूरोले करिब डेढ करोडमा खरिद गर्न लागेको ‘लग एनलाइसिस टुल्स’को ठेक्का हालै रद्द भएको छ । योग्यता नै नपुगेको कम्पनीलाई मिलेमतोका आधारमा ठेक्का दिन लागेको भनेर उजुरी परेपछि भ्रष्टाचारमा परिने डरले ठेक्का रद्द गरिएको छ । ह्याकिङसम्बन्धि अनुसन्धानका लागि ब्यूरोले सो प्रविधि खरिद गर्न लागेको थियो । ठेक्का रद्द भएपनि अख्तियारको छानबिन भने रोकिएको छैन । ठेक्का प्रक्रियामा संलग्न केहीलाई आयोगले बयानमा बोलाउने तयारी गरेको छ ।
उता काठमाडौं परिसर र काठमाडौं उपत्यकाका अपराध अनुसन्धान कार्यालयको भवन निर्माणमा पनि अनियमितता भएको उजुरी परेका छन् । काठमाडौं परिसरको भवन निर्माणको ठेक्का समानान्तरले पाएको हो । करिब ९० करोड रुपैयाँमा उसले सो ठेक्का पाएको हो । ठेक्कामा एकातर्फ मिलेमतो रहेको र अर्कोतर्फ समयमा काम समेत नहुने देखिएको छ । सम्झौताअनुसार दुई वर्षभित्र काम सम्पन्न हुनुपर्नेमा आधा काम पनि सम्पन्न भएको छैन ।
त्यस्तै, अपराध अनुसन्धान कार्यालयको भवन टेकुमा निर्माण भइरहेको छ । विकोई विल्डर्सले सो भवन निर्माण गरेको हो । उनको काम अझै सुस्त छ । प्रहरीलाई ठेक्काको कमिसन खुवाइसकेको भन्दै उनीहरुले एकातर्फ निर्माणमा ढिलाई गरेका छन् भने, अर्कोतर्फ सम्झौतामा उल्लेख भएअनुसार संरचना समेत निर्माण नभएको स्रोत बताउँछ ।
त्यस्तै, सिम लोकेटर मेसिन खरिदको ठेक्कामा पनि अख्तियार दुरुपयोग अनुसन्धान आयोगले छानबिन गरीरहेको छ । सेटिङका गोल्छा समूहको नियोटेरिक नेपाल प्रालिले साढे सात करोडमा सो ठेक्का पाएको थियो । तर, उसले समयमा मेसिन जडान गर्न सकेन । मिलेमतोकै आधारमा असक्षम कम्पनीलाई ठेक्का दिन उसले काम गर्न सकेन । सिम लोकेटर खरिदको विवादमा सिआइबीका तत्कालिन प्रमुख एआइजी सहकुल थापा समेत विवादमा मुछिएका थिए । हाल खरिद प्रक्रिया रद्द भएपछि अदालतमा मुद्दा परेको छ ।
