२९ जेष्ठ, काठमाडौँ । ‘नम्बर प्लेटहरूमा देवनागरी लिपि लागू गर’ भन्ने मूल नाराका साथ प्राज्ञिक विद्यार्थी परिषद् नेपाल, पोखरा महानगर एवं पृथ्वीनारायण क्याम्पस एकाई समितिद्वारा देवनागरी लिपिरहितको इम्बोस्ड नम्बर प्लेट लागू गर्ने असंवैधानिक, अव्यावहारिक र राष्ट्रहित विपरीत निर्णयको विरोध एवं दबावमुलक र्‍याली प्रदर्शन कार्यक्रम पृथ्वीनारायण क्याम्पस गेट, पोखरा महानगर सदस्य देवी शेर्पालीजीको नेतृत्वमा सम्पन्न। ‘देवनागरी लिपिमा लेखिने नेपाली भाषा नेपालको सरकारी कामकाजको भाषा हुनेछ’ भनी नेपालको संविधानको धारा ७(१) मा उल्लेख भएको छ । त्यस्तै, ७(२) ले ‘नेपाली भाषाका अतिरिक्त प्रदेशले आफ्नो प्रदेशभित्र बहुसंख्यक जनताले बोल्ने एक वा एकभन्दा बढी अन्य राष्ट्रभाषालाई प्रदेश कानून बमोजिम प्रदेशको सरकारी कामकाजको भाषा निर्धारण गर्न सक्नेछ’ भनी प्रष्ट उल्लेख भएको हुँदा पनि यातायात व्यवस्था विभागले रोमन लिपिमा इम्बोस्ड नम्बर प्लेट लगाउनु पर्ने निर्देश जारी गर्नु संविधानको मर्मविपरीत रहेको विद्यार्थी परिषद्का कार्यकर्ताले व्यक्त गरेका छन् । प्राज्ञिक विद्यार्थी परिषद् नेपालले देशभरि नै नम्बर प्लेट देवनागरी लिपिमै हुनुपर्ने माग गर्दै कार्यक्रम गरिरहेको छ ।