जेठ ३०, काठमाडौं । दैनिक उपभोग्य सामानको बढ्दो  मूल्य वृद्धिसंगै पिउने पानीको पनि अस्वभाविक रुपमा मूल्यवृद्धि भएको छ । दैनिक जीवनमा असर पुग्ने गरी पिउनेपानीको मूल्य वृद्धि पछि उपभोक्ताहरुले चिन्ता व्यक्त गरेका छन् । पहिलाको तुलनामा हाल पानी जारको मूल्य वृद्धि भएपछि चौतर्फी  विरोध आईरहेको छ । त्यस्तै नेपाल बोटल वाटर उद्योग संघले पिउने पानीको जारमा मूल्यवृद्धि गरेपछि उपभोक्ता मारमा पर्ने निश्चित भएको जनाउँदै आपत्ति जनाएको छ । यसअघि बिक्रेता संघलाई १० रुपैयाँमा दिने जार अहिले १८ रुपैयाँ तोकिएको भन्दै उपत्यका बोटल तथा जारपानी बिक्रेता संघले आपत्ति जनाएको हो । बढ्दो महंगीसँगै केही मूल्य समायोजन स्वभाविक भएपनि एकैपटक जारमा ८ रुपैयाँ बढाउनु जनताको ढाड सेक्न खोजिएको उपत्यका बोटल तथा जार पानी बिक्रेता संघका अध्यक्ष राजेन्द्र अधिकारीले बताए । उद्योगीहरुले जारमा ८ रुपैयाँ बढाएर १८ रुपैयाँ कायम गरेपछि पानी वितरकहरुले हाल ३५ रुपैयाँसम्म जार बेच्नु परेको छ । खुद्रा व्यापारीसम्म आइपुग्दा हालको पानीको मूल्य लागतसहित ५० देखि ६० रुपैयाँ पर्न आउने देखिएको छ । उद्योगीहरुको एकल निर्णयले जनता मारमा परेको भन्दै उपत्यका बोटल तथा जारपानी बिक्रेता संघले विरोध शुरु गरेको संघ अध्यक्ष अधिकारीले जनाएको छ । उद्योगीहरुले उपभोक्ताको समस्यालाई ध्यानमा राख्नुपर्ने भन्दै आवाज समेत उठ्न थालेको छ । पानीको अस्वभाविक मूल्यवृद्धिमा सरकारले पनि ध्यान दिनुपर्ने नागरिकहरुले बताएका छन् ।