३१ जेष्ठ काठमाडौँ । सरकारले नयाँ भूउपयोग नियमावली कार्यान्वयनमा ल्याएसँगै देशभरिका मालपोत कार्यालयमा जग्गा रोक्का गर्ने कार्य बन्द हुँदा बैंकहरूको ऋण लगानी ठप्प भएको छ । हिजोदेखि मालपोत कार्यालयमा जग्गा धितो रोेक्का गर्ने कार्य बन्द भएपछि बैंकहरूको ऋण लगानी पनि बन्द गर्नुपर्ने अवस्था भएको बैंकरहरू बताउँछन् । भूउपयोग नीतिमा जग्गाको आवासीय क्षेत्र र कृषि क्षेत्र वर्गीकरण गर्नुपर्ने व्यवस्था रहेको र उक्त वर्गीकरण नगरिएको जग्गामा मालपोत कार्यालयले रोक्का गर्न नमानेपछि बैंकहरूको कर्जा लगानी ठप्प भएको हो । भूउपयोग नियमावलीले जग्गाको वर्गीकरण नहुँदासम्म कित्ताकाटसँगै धितो रोक्का पनि गर्न नमिल्ने व्यवस्था गर्दा मालपोत कार्यालयले धितो रोक्का गर्न नमिलेको भूमि व्यवस्थापन तथा अभिलेख विभागका प्रवक्ता कृष्णप्रसाद भण्डारी बताउँछन् । “भूमि व्यवस्था, सहकारी तथा गरिबी निवारण मन्त्रालयको प्रस्तावमा मन्त्रिपरिषद्ले निर्णय गरेर कार्यान्वयनमा गएको भूउपयोग नीतिले गर्दा जटिलता र कठिनाइ सिर्जना भएको छ,” उनले भने, “त्यसको उपयुक्त समाधान निकाल्न सकिन्छ भनेर मन्त्रालयसँग छलफल भइरहेको छ । यसमा सरकारले नै निकास दिनुपर्ने देखिन्छ ।” जग्गा वर्गीकरण नगर्दासम्म मालपोतले धितो रोक्का नगर्ने मालपोत कार्यालयहरूको भनाइ रहेको बैंकरहरू बताउँछन् । माछापुच्छ्रे बैंकका प्रमुख कार्यकारी अधिकृत सन्तोष कोइराला मालपोत कार्यालयहरूले जग्गा कुन प्रकृतिको हो वर्गीकरण गर्न नसक्दा अन्योल देखिएको र धितो रोक्का हुन नसकेको बताए ।