३ असार, काठमाडौँ । अन्तर्राष्ट्रिय सम्बन्ध समितिले अमेरिकी ‘स्टेट पार्टनरसीप प्रोगाम’का लागि गरिएका सम्पूर्ण पत्राचारका कागजातहरु मागेको छ । सिंहदरबारमा शुक्रबार बसेको परराष्ट्रमन्त्री, प्रधानसेनापति लगायतका विशिष्ट व्यक्तिहरुलाई डाकेर गरिएको छलफलपछि ‘एसपीपी’ बारे अध्ययनका लागि विगतदेखिको पत्राचारका कागजात मागिएको हो । समिति सभापति पवित्रा निरौला खरेलले सरकार तथा नेपाली सेनाबाट भएका पत्राचार समितिलाई उपलब्ध गराउन निर्देशन दिएकी हुन् । छलफलमा ईश्वर पोखरेल, भीम रावल लगायतका सांसदहरुले एसपीपीबारे संसदीय छानविन गर्न माग गरेका थिए । साथै प्रधानमन्त्री शेरबहादुर देउवाको आसन्न अमेरिका भ्रमण र एजेण्डाबारे जानकारी गराउनका लागि असार ५ गते प्रधानमन्त्री देउवालाई समितिको बैठकमा आमन्त्रण गरिएको जानकारी गराइन् । उनले प्रधानमन्त्री देउवालाई स्पष्टिकरण लिनका लागि बोलाउने नभई प्रधानमन्त्रीको धारणा लिएर प्रष्ट हुनका लागि बोलाइएको बताइन् । उनले हरेक सरकार परिवर्तनसँगै नेपालको परराष्ट्रनीति फेरिन नहुने बताइन् । उनले भारत र चीन नेपालको छिमेकी राष्ट्र रहेकोले सबैसँग समान कुटनीतिक सम्बन्ध कायम गरेर अघि बढ्नुपर्नेमा जोड दिइन् । उनले नेपालको परराष्ट्र नीतिको बारेमा अध्ययन गर्न संसदको अन्र्तराष्ट्रिय सम्बन्ध समितिले उपसमिति बनाएको र त्यसले काम गरिरहेको पनि जानकारी गराइन् । उनले सरकारलाई परराष्ट्र नीतिको बारेमा उपयुक्त सल्लाह सुझाव दिने प्रयास गरेको उल्लेख गरिन् ।